Стапката на преживување кај критично болните пациенти со кортикостероиди била 67 проценти, додека кај оние другите изнесувала 59 проценти. Зголемувањето од осум проценти всушност значи дека приближно еден од четири пациенти, кој инаку би умрел, благодарение на терапијата со кортикостероиди, ги преживеал овие 28 дена
Критично болните пациенти од COVID-19 имале значително поголеми шанси да преживеат во набљудуваниот период од 28 дена во кој биле лекувани со кортикостероиди во болница, покажале анализите на седум меѓународни истражувања.
Станува збор за анализи од големите бази на податоци за употреба на ниски дози на хидрокортизон, дексаметазон и метилпреднизон кај пациенти со коронавирус, чија состојба била толку тешка што морале да бидат хоспитализирани на интензивна нега.
Journal of the American Medical Association, каде што е објавен написот, наведува дека биле анализирани податоци на 1703 критично болни од 12 земји од светот, вклучувајќи ги и Велика Британија, Бразил, Канада, Кина, Франција, Шпанија и САД.
Од проучуваните пациенти, 647 не успеале да се изборат со коронавирусот и починале во болница. Но, она што било исклучително важно дури и кај починатите пациенти била стапката на преживување во текот на 28-те дена додека биле третирани односно не биле третирани со кортикостероиди.
Истражувањата покажале дека кај најтешко болните, стапката на смртност со примена на кортикостероиди во текот на 28 дена била 33 проценти, додека кај оние кои не биле третирани на тој начин, смртноста изнесувала 41 процент.
Или, стапката на преживување кај критично болните пациенти со кортикостероиди била 67 проценти, додека кај оние другите изнесувала 59 проценти. Зголемувањето од осум проценти всушност значи дека приближно еден од четири пациенти, кој инаку би умрел, благодарение на терапијата со кортикостероиди, ги преживеал овие 28 дена.
Агенциите наведуваат дека меѓу истражувачите се и Џонатан Штерн, професор по медицинска статистика и епидемиологија на Универзитетот во Бристол, Ентони Гордон од Империјал колеџ во Лондон, Мартин Ландреј од Оксфорд, експерт за епидемиологија и многу други.
