♦♦♦♦♦♦♦
Како ќе изгледа новата учебна година во Хрватска и дали сите деца ќе одат на училиште? Д-р Алемка Маркотиќ, директорка на Клиниката за инфективни болести „Д-р Фран Михаљевиќ“ за Нова ТВ вели дека одредени истражувања покажале дека децата не се значајни пренесувачи на COVID-19, особено децата во пониските одделенија во основните училишта.
„Очекуваме децата редовно да тргнат на училиште. Можеби малку поголем ризик се оние од средните училишта, важно е да не се вратат директно од забава во училиште. Планот е децата да тргнат на училиште и да се следи ситуацијата. Ако се појави некое жариште, треба веднаш да се санира“, вели Маркотиќ.
Ако едно дете од одделението се зарази, ќе се работи по истите принципи како и досега кога ќе се појави инфекција. „Контактите мора да одат во изолација“, вели докторката.
Како наесен ќе се прави разлика помеѓу COVID-19 и грип
На прашањето како здравствените работници наесен ќе направат разлика помеѓу COVID-19 и грип, Маркотиќ вели „клинички тешко“.
„Ќе се потрудат сите лекари и здравствениот систем во комуникација со сите да дефинираат за која болест се работи. Сигурно ќе има совети за сите што имаат поблаги респираторни инфекции да останат дома, на оние на кои им е потешко да дојдат во болница на преглед и евентуална хоспитализација“, заклучува Маркотиќ.
