ПИШУВА: Д-р Антоније Хаџи Антоновски
специјалист ортопед
♦♦♦♦♦♦♦♦♦
Многу често во мојата лекарска пракса имаме повредени деца од негрижа на родителите. Имањето дете не е доволно само по себе за да се наречеме родители ако не ги пренесеме низ детството безбедно.
Една многу битна алка од таа безбедност е безбедноста на децата во автомобил. Точно е дека ние кога сме биле деца сме се возеле без седишта, но точно е и дека бројот на автомобили бил помал, а и за да се добие возачка дозвола било малку построго. Денес, за жал, секој поседува возачка дозвола, а судејќи по бројот на сообраќајни несреќи многу од нив не треба да ја имаат или возат без да ја поседуваат истата. Се на се, надвор има многу неодговорни луѓе и затоа ние треба да бидеме екстра внимателни кога ги возиме нашите најмили во автомобил.
За да не биде збунувачки нема да пишувам за групи на седишта туку ќе се обидам тоа да го претставам преку возраста на детето.
Еден многу битен податок за родителите: плачењето не повредило ниедно дете, додека земањето на детето во раце во кола додека плаче и тоа како повредило. Кога детето во кола се држи во раце при нагло кочење или сообраќајна незгода станува предмет и лета без да може да биде задржано од родителот
За најмладите уште од излегување од болница веднаш транспортер. Во транспортерот бебето е како во стомакот на мајката, а таму не лежело како во кревет. Напротив, било целото стуткано, како во транспортерот! Значи, родители, баби и дедовци: не треба да ставате еден куп перници и ќебиња под бебето во транспортерот. Само бебето внатре и закопчани каиши.
КОГА СЕ РАБОТИ ЗА БЕЗБЕДНОСТ НЕМА УДОБНОСТ!
Во автомобилот бебето се поставува обратно од правецот на возење (грб со грб со предните седишта) и детето ќе се вози така до проодување.
НАПОМЕНА: Проодувањето е момент кога детето само ќе прооди, а не кога некој ќе го фати за раце за да оди.
Вратот на детето додека не прооди не може да го издржи моментот на кочење спрема напред, а тек сообраќајна незгода, па затоа додека не проодат децата се возат во обратен правец на возењето. Во некои европски држави задолжително е транспортирањето на децата да биде во обратен правец на возењето до двегодишна возраст. Во транспортерот, ако патувате повеќе од два часа потребно е да направите една кратка пауза од 15 мин. за да го извадите бебето од автомобилот малку да се исправи.
Транпортерот е надраснат ако главата на бебето е стигната два сантиметри од врвот на седиштето, стапалата може да се надвор од седиштето, но главата не смее никако. Ако детето го надрасне транспортерот тогаш треба да купите големо седиште со (0) нула ознака: 0 до 18, 0 до 25 или 0 до 36, сите овие седишта може да се наместат обратно од правецот на возењето.
Откако детето ќе прооди може да го наместите седиштето во правецот на возење.
Ако детето прооди, а се уште го користите транспортерот, тогаш може да земете големо седиште со ознака 9 до 18, 9 до 25 или 9 до 36.
Понатаму е лесно, како расте детето ја менувате класата или го подесувате седиштето. За тие што земале до 18, потоа најдобра препорака е да земат 15 до 36 група.
Вратот на детето додека не прооди не може да го издржи моментот на кочење спрема напред, а тек сообраќајна незгода, па затоа додека не проодат децата се возат во обратен правец на возењето
Седиштата со „ISO FIX SYSTEM“ не се побезбедни од оние што се фиксираат со каиш, само полесно се монтираат и не се нишаат во автомобилот. Главната безбедност ја дава каишот на автомобилот.
Еден многу битен податок за родителите: плачењето не повредило ниедно дете, додека земањето во раце во кола на детето додека плаче и тоа како повредило. Кога детето во кола се држи во раце при нагло кочење или сообраќајна незгода станува предмет и лета без да може да биде задржано од родителот. Затоа бидете одговорни родители и користете седишта за вашите најмили. Секако и вие сте битни, затоа закопчајте го и вашиот каиш.
