Д-р Бујар Абдиу: Инфантилните колики се преодна етапа која не е болест и не остава последици по здравјето на бебето

ПИШУВА:
Д-р Бујар Абдиу
специјалист педијатар

♦♦♦♦♦♦♦

Инфантилни колики

Инфантилните колики се една од најчестите причини за посета на педијатриските амбуланти. Вредно е да се спомне дека грчевите во доенечкиот период не претставуваат болест, туку се една вообичаена развојна појава која доведува до дискомфор кај бебињата. Се појавуваат негде после 2-3 недела и траат отприлика до 3-4 месец кај 30-40% од доенчињата, а кај некои и подолго. Се манифестираат со интензивен плач, вознемиреност, пореметување на сонот и хранењето на доенчето. Најчесто се јавуваат во попладневните и вечерните часови и траат по неколку часа.

Точниот етиолошки фактор не е се уште познат, но се претпоставува дека причините може да се различни: од голтање на воздух при доење или пиење на млеко од шише, неподносливост на млеко, недоволно развиен ГИТ, пореметена хормонска рамнотежа, исхрана на мајката итн. Која било и да е причината, на почетокот потребно е од страна на педијатар да се исклучи органско заболување, а потоа да им се објаснува на родителите дека тоа е една преодна етапа која не е болест и не остава последици по здравјето на бебето.

Инфантилните колики се манифестираат со интензивен плач, вознемиреност, пореметување на сонот и хранењето на доенчето. Најчесто се јавуваат во попладневните и вечерните часови и траат по неколку часа

Интензитетот и времетраењето на коликите во голема мера се поврзани со неправилното хранење на доенчето, неправилното држење при доење или лошо држење на шишето, давање на млеко на помали интервали или секогаш кога бебето плаче, недоволно или нередовно подждригнување после подој, врзување на бебето со што се намалува физичката активност, лоша исхрана на мајката итн.

За ублажување или превенирање на коликите потребно е:

– Доволно трпение и внимание при исхраната на доенчето, посебно кај оние што се хранат со шише да не голтаат поголеми количини на воздух;

– Да се внимава на исхраната на мајката (да се исклучат газирани пијалаци, сувомеснати производи, грав, зелка, пушење итн.) иако не постојат цврсти докази дека исхраната на мајката е поврзана со коликите;

– После подој бебето треба да се држи исправено за да подждригне за да се елиминира голтнатиот воздух;

– Лесна мануелна масажа на стомаче, топли пелени, свиткување на ноџињата на бебето во странична положба или утерична положба;

– Како препарати кои би помогнале во намалувањето на грчевите зависно од состојбата на бебето препорачуваме препарати на симетикон (како лек што разградува гасни меурчиња), препарати на лактаза (ензим кој ја разградува лактозата на глукоза и галактоза);

– Во последен период се повеќе препорачуваме давање на пробиотици, посебно на Lactobacillus Reuteri protectis (LRP), со кој имаме солидни резултати во намалување на дискомфорот кај бебињата. За LRP постојат и бројни студии кои ја докажуваат ефикасноста во поглед на намалување на дискомфорот кај бебињата, а со тоа и намалување на посетите на педијатриските амбуланти.

◊◊◊◊◊◊◊

ПОВЕЌЕ ОД ИСТИОТ АВТОР, Д-Р БУЈАР АБДИУ, СПЕЦИЈАЛИСТ ПЕДИЈАТАР:

• Новите намирници во исхраната на доенчето се воведуваат постепено, една по една и во мали количини (една до две лажички)
• Не оставајте го домашното милениче да го лиже бебето по лицето
• Се препорачува додавање на витамин Д од втората недела од новороденечкиот период без разлика на витаминскиот статус на мајката
• Несаканите ефекти се многу ретки и незначителни во споредба со бенефитот од примената на вакцините