Мачнината при патување со автомобил е вид на болест при движење. Болеста при движење се јавува кога мозокот добива спротивставени информации од внатрешните уши, очи и нервите во зглобовите и мускулите.
Замислете мало дете кое седи ниско на задното седиште во автомобилот без да може да види низ прозорецот – или постаро дете како чита книга во автомобилот. Внатрешното уво на детето ќе го почувствува движењето, но неговите или нејзините очи и тело нема. Резултатот може да биде вознемирен стомак, ладна пот, замор, губење на апетит или повраќање.
Не му давајте на вашето дете голем оброк непосредно пред или за време на патувањето со автомобил. Ако патувањето биде долго или вашето дете треба да јаде, дајте му мала закуска – како што се суви крекери и мал пијалак – пред да дојде време да тргнете
Не е јасно зошто „автомобилската болест“ влијае на некои деца повеќе од другите. Иако се чини дека проблемот не влијае на повеќето доенчиња и мали деца, децата на возраст од 2 до 12 години се особено подложни.
Како што советува д-р Џеј Л. Хокер од Мајо клиника, за да спречите мачнина при патување со автомобил кај децата, можете да ги испробате следните стратегии:
Намалете го сензорниот инпут. Охрабрете го вашето дете да гледа на работите надвор од автомобилот наместо да се фокусира на книги, игри или екрани. Ако вашето дете дреме, патувањето за време на дремката може да помогне.
Внимателно планирајте ги оброците пред патување. Не му давајте на вашето дете голем оброк непосредно пред или за време на патувањето со автомобил. Ако патувањето биде долго или вашето дете треба да јаде, дајте му мала закуска – како што се суви крекери и мал пијалак – пред да дојде време да тргнете.
Обезбедете вентилација на воздухот. Соодветната вентилација на воздухот може да помогне да се спречи мачнината при патување со автомобил.
Понудете му нешто за одвлекување на вниманието. Ако вашето дете е склоно кон мачнина при патување, обидете се да му го одвлечете вниманието за време на патувањата со автомобил со разговор, слушање музика или пеење песни.
Користете лекови. Ако планирате патување со автомобил, прашајте го докторот на вашето дете за користење на антихистаминици без рецепт, за да спречите „автомобилска болест“. Лековите најдобро делуваат ако се земаат околу еден час пред патувањето. Внимателно прочитајте ја етикетата на производот за да ја одредите точната доза и бидете подготвени за можни несакани ефекти, како што е поспаност.
Ако вашето дете почне да развива „автомобилска болест“, запрете го автомобилот што е можно поскоро и оставете го вашето дете да излезе и да оди наоколу или да лежи на грб неколку минути со затворени очи. Поставувањето ладна крпа на челото на вашето дете исто така може да помогне.
Ако овие совети не помагаат или ако „автомобилската болест“ на вашето дете го отежнува патувањето, разговарајте со докторот на вашето дете за други опции. (Мајо клиника)
