♦♦♦♦♦♦♦
Познатиот руски педијатар, доктор на медицински науки, телевизиски водител и автор на 15 книги за нега на децата, д-р Евгениј Комаровски, ги советува родителите како правилно да ги заштитат децата од налетот на вируси и настинки, пренесува „Атма“.
Сезоната на настинки и вирусни инфекции е во тек, а пред нас е период во кој многу деца престојуваат во градинка седум дена, па потоа се две недели дома и така се во круг.
Како прво и основно за да се заштитиме од вирусните инфекции, рускиот педијатар Евгениј Комаровски го наведува престојот на отворено (н.з. во услови на загаден воздух одличен избор се околните планини) и избегнувањето на гужви.
Не постојат лекови кои ја намалуваат веројатноста за заболување од вирусна инфекција. Веројатноста за заболување се намалува со здрава исхрана, активен начин на живот, доволно сон, насмевка и ведро расположение
„Концентрацијата на вируси под ведро небо е илјадници пати помала отколку во кој било затворен простор, било тоа да е стан, училница, автобус“, вели тој.
Затоа, треба да размислиме двапати пред да ги однесеме децата каде било, а тоа да не е надвор. „Тажна е глетката на армија деца на подвижните скали во трговските центри, кои брзаат кон игротеките „бидејќи надвор е ладно“.
„Тажно е и тоа што често ќе слушнете од дете кое оди во градинка: „Денеска не бевме надвор“. Зошто? „Па, ладно е“.
Ако некој во непосредната околина кива, кашла или шмрка – држете растојание
„Сигурно е дека негувателките знаат колку е важен престојот надвор и се надевам дека се поблиску е моментот кога престојот надвор навистина ќе стане задолжителен и кога ќе влезе во рубриката „малтретирање на детето“ или барем ќе престане да важи како аргумент – објаснувањето дека „детето е убаво облечено па не може надвор“.
Што советува познатиот руски педијатар?
- Ако некој во непосредната околина кива, кашла или шмрка – држете растојание.
- Не треба посебно да се потенцира миењето на рацете и проветрувањето на просториите. И врапчињата знаат дека честичките на вирус опстојуваат со часови и денови во задушлив, топол и застоен воздух, а практично умираат во истиот момент на чист, разладен, влажен и свеж воздух.
- Д-р Комаровски ги наведува и оптималните вредности на воздухот во просториите во кои се престојува: температура од 16 до 22 °C, релативна влажност на воздухот од 40 до 70%. „Држете се до овие граници“, вели тој. „Ако ви е ладно, облечете се! Не се презагревајте! Одржувајте ја влажноста во просторијата. Проветрувајте!“
- Ставете ракавици кога треба да допрете нешто на јавни места (посебно внимание на држачите во градскиот превоз).
- Навлажнувајте ја слузокожата на дишните патишта. Користете солени капки. Колку повеќе луѓе во околината, толку повеќе капки во носот, но оние на база на солени раствори и аеросоли. Плакнете ја устата со обична вода. Направете сами солен раствор: 1 лажичка сол на 1 литар зовриена вода.
„Во последниве години сè почесто се носат маски (одбивам да ги замислам децата како трчаат со маски во трговскиот центар!). Меѓутоа, маската не ја заштитува здравата личност и нема причина да ја носи оној кој е здрав“, вели д-р Комаровски, додавајќи:
„Маската ја носи заболениот и на тој начин се намалува неговата заразност. Не постојат лекови кои ја намалуваат веројатноста за заболување од вирусна инфекција. Веројатноста за заболување се намалува со здрава исхрана, активен начин на живот, доволно сон, насмевка и ведро расположение“, додава познатиот руски педијатар.
