Како лекар за заразни болести и микробиолог, кој успешно лекувал пациенти со вирусот на Ебола во САД, ми поставуваат многу прашања во врска со новиот коронавирус, Covid-19.
Една жена со која разговарав беше загрижена дека очилата за читање кои ги порачала од Кина би можеле да бидат заразени со вирусот и опасни по нејзиното здравје. Одговорот е краток: тоа е малку веројатно“, вели д-р Колин Крафт од Универзитетската болница „Emory“.
И додека коронавирусот може да егзистира на површини со денови, условите како што се температурата и влажноста мора да бидат поволни. Covid-19 првенствено се шири преку близок контакт со некој кој е заразен.
За време на вирусна пандемија, ние честопати сме си наши најлоши непријатели. Го допираме лицето со рацете, вклучувајќи го и носот, очите и устата – области со мукозни мембрани, во просек од 15 до 23 пати на час. Голем дел од времето, дури и не сфаќаме дека го правиме тоа. Исто така, ги допираме рачките на вратите, држачите во автобусите, соларниците, рацете на другите луѓе и количките за намирници. Вдишуваме ситни капки кои доаѓаат од некој што кива или кашла во нашата близина.
Еве го најдобриот совет што можам да ви го дадам, за да избегнете кој било вирус и грип: Бидете исклучително внимателни во однос на хигиената во јавност и за време на интеракциите со другите. Хигиената на рацете е камен темелник на превенцијата на инфекции. Ефективната хигиена на рацете бара соодветно времетраење и темелност, што треба да биде цел секој пат кога ќе ги миеме рацете.
Користете сапун и вода во времетраење на една испеана песна „Среќен роденден“ или дезифицирајте ги рацете со средство на база на алкохол. Во студијата што ја спроведовме на тема хигиена на рацете, најчестите области кои луѓето ги прескокнуваат при миењето се: палците, зглобовите и делот меѓу прстите.
Многу е едноставно: добрата хигиена на рацете и лицето ќе ве заштити од многу болести, вклучувајќи го и Covid-19.
Мојот ризик, како лекар за заразни болести, е малку зголемен, бидејќи постојано сретнувам лица со респираторни вируси. Но, мојата најдобра одбрана е иста како и вашата: бидете свесни за потенцијалната изложеност и ублажете ја, бидете внимателни што допирате, и не заборавајте да ги миете рацете добро и често.
(Пошироката верзија на текстот може да ја прочитате на сајтот на Си-ен-ен).
