ПИШУВА:
Д-р Маќули Хаџи-Лега
специјалист по гинекологија и акушерство
♦♦♦♦♦♦♦
Тегоби во бременоста кои не смеат да се игнорираат (2)
Покачен крвен притисок, отоци, главоболка, проблеми со видот, слаби движења на плодот… – сето тоа е последица на состојба на плодот кога имаме нарушена циркулација, предвремено стареење на постелката што доведува до намалено движење на плодот, намалена околуплодова вода, иако со денешните современи ултразвучни апарати ние ги третираме доста рано и успеваме успешно да се справиме со тоа. Во однос на покачениот крвен притисок, апсолутно секоја трудница треба редовно да го контролира притисокот, на почетокот на бременоста еднаш на две-три недели, но во втората половина, после 27-28 недела треба да се контролира еднаш неделно.
Некогаш трудниците може да не чувствуваат дека имаат покачен крвен притисок, но многупати на рутинска контрола се открива дека се работи за покачен крвен притисок, потоа се појавуваат отоци како последица на нарушената функција на бубрезите, па почнува да страда постелката, следствено на тоа и плодот и тука веќе се случуваат мултипли компликации и по мајката и по плодот и тие се навистина животозагрозувачки состојби. Многупати сме принудени предвреме да ја завршиме бременоста, можеби и два месеци порано во интерес на мајката и бебето.
Би сакал да упатам еден апел и до матичните гинеколози кои ги водат бременостите да не го занемаруваат мерењето на крвниот притисок, телесна тежина и соодветна исхрана во бременоста, крвна слика, уринокултура – сето тоа да се прави редовно
Гестациски дијабет
Во смисла на гестацискиот дијабет и тој е сега веќе влезен во рутинските протоколи – од 24 до 28 недела се прават орални глукоза толеранс тестови за предикција на тој т.н. скриен шеќер којшто се јавува во бременоста и исто така може да биде опасен по плодот затоа што самиот гестациски дијабет го забавува зреењето на белите дробови. Тие бебиња се крупни, се раѓаат преку 4 кг, а немаат зрелост на белите дробови и после раѓањето се навистина проблем за педијатрите и во минатото неретко се случуваше и да починат, а ги нарекуваат „џинови на стаклени нозе“. Сега и на ултразвучните прегледи кога ќе видиме зголемен обем на стомак кај бебето секогаш може да ни асоцира на гестациски дијабет.
Апел до матичните гинеколози
Би сакал да упатам еден апел и до матичните гинеколози кои ги водат бременостите да не го занемаруваат мерењето на крвниот притисок, телесна тежина и соодветна исхрана во бременоста, крвна слика, уринокултура – сето тоа да се прави редовно. Честопати ќе ги прашам трудниците дали мереле крвен притисок, ми одговараат дека никој не им кажал. Треба и самите да инсистираат, знаат, читаат, се информираат. Покачениот крвен притисок, состојба која ние ја нарекуваме прееклампсија, којашто доколку успешно не се третира и менаџира може да премине во еклампсија којашто е навистина животозагрозувачка состојба на мајката со една акутна состојба, затемнување пред очите, светки пред очите, несвестица или губење на свеста, одлепување на постелката и ако не се реагира на време може да биде катастрофално по мајката и по бебето.
Намаленото движење на плодот – состојба која загрижува
Движењето на плодот на крајот на бременоста за нас е, исто така, еден важен маркер. Ако мајката, трудницата каже дека не го чувствува плодот толку колку што го чувствувала порано, нас ни е еден сигнал дека нешто се случува и ќе не натера рутински уште еднаш да направиме ехо, да видиме каков е протокот и како се храни плодот преку постелката па да се провери хемостазата…
Навистина ни е од помош кога ќе каже трудницата дека плодот се движи помалку во стомакот, таа најдобро си го знае организмот и знае како било претходно. Ако редовно остане со истите движења тоа е добар знак, значи нема страдања. Ако ги намали движењата на крајот на бременоста според искуството што го имаме како гинеколози-акушери тоа е знак дека нешто се случува.
◊◊◊◊◊◊◊
ПОВЕЌЕ ОД ИСТИОТ АВТОР, Д-Р МАЌУЛИ ХАЏИ-ЛЕГА:
- Кај надносени бебиња често се јавува заматена плодова вода, а тоа е знак дека породувањето треба да се изврши брзо
- И без првата менструација може повторно да останете бремени краток период после породувањето
- „ЕПИДЕМИЈА“ НА ЦАРСКИ РЕЗОВИ Mлади, здрави жени, без патологија инсистираат да се породат со царски рез
- Кај 90% од прворотките се прави епизиотомија, најчесто се сече на десната срамна усна за да може бебето полесно да помине
