Децата кои ги чуваат баби и дедовци се изложени на 30 проценти поголем ризик од развој на обезност или дебелина, покажало истражување неодамна објавено во списанието Childhood Obesity.
Авторите на истражувањето, научници од Универзитетот Вашингтон до овој заклучок дошле откако анализирале 23 истражувања кои се спроведени во САД и осум други земји ( од Велика Британија до Кина и Јапонија). Главниот автор на истражувањето доц. д-р Рупенг Ан, вели дека резултатите најмногу го изненадиле бидејќи, без разлика на различните култури, бабите и дедовците во сите земји еднакво се “слаби“ на своите внуци.
И сите тие, секако сакаат да им угодат на своите внуци онака како што најдобро знаат, а еден од начините е да им удоволат во се што нивните внуци сакаат да јадат. Научниците се свесни дека бабите и дедовците тоа го прават од најдобри намери, не размислувајќи за последиците кои вклучуваат лоши прехранбени навики, физичка неактивност и лоша перцепција за здравиот начин на живот.
“Некои баби и дедовци ги тераат внуците да јадат поголеми и почести оброци, а често им нудат и слатки и пржена храна како начин на искажување на својата љубов“, вели д-р Ан и додава дека во некои култури тие во знак на љубов кон своите внуци ги изземаат и од домашни обврски и работа, што е исто така еден вид на физичка активност.
