Кај пациентите со дијабетес е важно во тек на ден-два да се следат вредностите на шеќер во крвта, да пијат доволно течности, особено ако превладува симптомот на слабост и малаксаност
Вакцинацијата во Србија е во полн ек, а ендокринологот проф. д-р Едита Стокиќ, директорка на Клиничкиот центар Војводина, вели дека многу граѓани со дијабетес прашуваат дали смеат или не смеат да ја примат вакцината против коронавирус.
„Дефинитивно е јасно познато и засновано на медицина базирана на докази дека лицата со дијабетес тип 1 и 2 имаат три до четири пати поголем ризик да се разболат од коронавирус со потешка клиничка слика, но од друга страна се покажа дека добрата гликорегулација е значаен фактор кој може да влијае на намалување на заболувањето и смртноста. Американската асоцијација за дијабетес, која е наш водич во стручниот аспект на лекување на дијабетесот, јасно истакна дека вакцинацијата е една од најбезбедните опции за излез од оваа епидемија и кај популацијата на дијабетичари. Значи, вакцинацијата е ефикасно терапевтско средство, безбедно, во спречување на заболување и ширење на Ковид-19 вирусна инфекција“.
Докторката исто така истакнува дека кај оваа популација немало посериозни несакани ефекти, но издаде и упатства што треба да се прави по имунизацијата.
„Кога се правени истражувањата, првенствено со вакцината на Фајзер, се следени и несаканите ефекти. Како што беше соопштено, тоа биле благи несакани ефекти, воглавно болка во раката и малаксаност, кои траеле многу кратко. Без оглед на тоа, знаеме дека овие реакции се јавуваат како имунолошки одговор на примената вакцина. Кај пациентите со дијабетес е важно во тек на ден-два да се следат вредностите на шеќер во крвта, да пијат доволно течности, особено ако превладува симптомот на слабост и малаксаност.“
Кога станува збор за други ендокринолошки заболувања, д-р Стокиќ вели дека тие не се контраиндикација за вакцинација.
„Кај другите ендокринолошки болести, најголем интерес има за болестите на тироидната жлезда и Хашимотов тироидитис, кој припаѓа на автоимуни заболувања. Но, веднаш посочувам дека овие болести не се контраиндикација за вакцинација. Исто така, употребата на хормонска заместителна терапија не е контраиндикација за вакцинација “, заклучува таа, а пренесува „Мондо“.
