Дали знаевте дека никогаш не треба да користите омекнувач кога ја перете облеката на вашето бебе? Сигурно сте забележале дека кожата на вашето бебе е исклучително мека, нежна, но и чувствителна, поради што често е подложна на иритација и осип. Самозаштитните механизми, кои постојат на кожата на возрасните, не се толку развиени кај младата кожа, а на бебешката и на детската кожа и е потребна посебна нега. Токму затоа треба да бидете многу внимателни кога станува збор за правилно третирање на детската облека.
Експертот за перење алишта Дејан Димитров објаснува зошто никогаш не треба да користите омекнувач при перење на облеката на вашите бебиња.
Имено, „омекнувачот за ткаенини понекогаш може да ја иритира чувствителната кожа на бебето, но што е уште поважно, може драматично да ја намали отпорноста на палмен на детската облека“, вели тој. Имено, омекнувачите содржат емулгатори и алкохолни етоксилати, кои се запаливи. Детската облека обично од безбедносни причини се третира со хемикалии отпорни на пламен, што значи дека користењето омекнувачи може да ја намали нивната ефикасност. Поради ова, Димитров ги советува родителите да избегнуваат употреба на омекнувачи при перење алишта за бебиња и деца, особено кога станува збор за материјали како што се фротир, кадифе или облека што е означена како отпорна на пламен, пренесува Дејли стар.
Што да се користи наместо омекнувач?
Ако перете алишта обработени со хемикалии отпорни на пламен, но сакате да ја одржувате мека, постојат одредени чекори што ќе ја заменат употребата на омекнувач. За почеток, најдобро е да користите програма за перење нежни алишта, бидејќи тогаш циклусот на центрифугирање е многу помал и нема целосно да ја исуши облеката, што значи дека облеката нема да стане груба. Исто така, перете ја облеката на ниска температура со благ небиолошки детергент. Тој делува добро на ниски температури од 20 степени, па затоа е идеален за постудено перење. Сушете ги алиштата природно и избегнувајте да користите машина за сушење.
Дали треба да се користи специјален детергент за перење детска облека?
Многу родители се загрижени дали нормалниот детергент или прашокот за перење ќе бидат „премногу агресивни“ за нежната кожа на нивното дете. Ви предлагаме да направите тест. Ставете две или три парчиња бебешка облека во машината заедно со вашите алишта. Доколку бебето не реагира по носењето на облеката, можете слободно да ја перете бебешката облека со детергентот што го користите и нема потреба да купувате поблаг „бебешки“ детергент.
Исто така, претпочитајте да користите течен детергент наместо прашкаст бидејќи подобро се плакне, особено кога се плакне со „тврда“ вода. „Ако вашето дете нема алергии или многу чувствителна кожа, без оглед на возраста, можете да користите обичен детергент“, вели Мери Спракер, педијатриски дерматолог од Универзитетот Емори.
За чувствителна кожа, избегнувајте омекнувач
“Не е толку важно кој детергент ќе се користи, но секако е важно алиштата да се измијат добро. За деца кои имаат чувствителна кожа, можете да ја поставите машината на две плакнења. Во такви случаи, се препорачува да се избегнуваат омекнувачи во целост и да се користи облека од памук и свила“, објаснува педијатарот прим. д-р Алемка Јаклин Кекез.
