„Нема ништо лошо во тоа да се биде гол пред членовите на своето семејство“, вели Пол Абрамсон, професор по човечка сексуалност на Универзитетот во Лос Анџелес, кој додава дека една студија покажала дека изложеноста на голотија на родителите немала негативни ефекти врз децата на возраст од 3 до 6 години. Но, и покрај ова, тоа се уште е чувствителна тема за секој родител, па експертите објаснуваат како да разговарате со децата за голотијата и кога е време да почнете да се „криете“.
Поставете граници
Арон Прос, татко на три девојчиња од Делавер, забележал дека почнал повеќе да прикрива и да ја напушта собата за да се пресоблече кога неговата постара ќерка наполнила 4 години. „Конзервативно сум воспитан, така што тој менталитет е некако вкоренет во мене. Не сакам повеќе да ме видат гол“, истакнува тој. И експертите истакнуваат дека и ова е сосема во ред. „Ако ви е удобно да бидете гол во пред вашите деца, бидете голи. Ако не ви е, оставете ја облеката на себе“, објаснува сексуалниот терапевт Ејми Ланг. „Но, пораката до детето мора да биде дека се работи за приватност, а не за срам, непријатност или нешто негативно“, истакнува таа.
Одговорете им на сите прашања на децата
Кога децата се приближуваат до 3-годишна возраст, тие почнуваат да покажуваат интерес за човечкото тело – како изгледа и како функционира. Ова се однесува на прстите на нозете, стомакот и ушите, но и на делови од телото кои обично се покриени со долна облека. Кога децата гледаат голо тело, природно е да имаат прашања. Мајката Марта Шонеси открила дека нејзините момчиња станале пољубопитни кога наполниле 4 и 6 години. Прашањата се движеле од зошто некои делови од телото имаат влакна до зошто некои луѓе имаат пенис, а други немаат. Вистина е дека децата ќе бидат изложени на сексуализирани, фотошопирани слики на голи или полуголи возрасни кои се распространети во рекламите и на насловните страници на списанијата. Затоа е добра идеја да се зборува за тоа што е можно поскоро. „Треба да почнеме да ги учиме децата уште од мали нозе дека сме природно несовршени и дека нашите тела минуваат низ промени и транзиции“, вели Авива Браун, социјален работник од Њујорк. Настојувајте одговорите да бидат соодветни за возраста на детето и не навлегувајте во многу детали.
Обрнете внимание на чувствата на вашето дете
Бидете свесни дека ставот на вашето дете кон голотијата може да се промени како што расте. Вашето дете може да почне да ја затвора вратата од својата соба кога се пресоблекува или да ви го сврти грбот додека се облекува. Тие можат набрзина да се повлечат откако ќе налетаат во вашата соба и ќе забележат дека сте голи. Ова најчесто се случува за време на пубертетот. „Императив е да ги почитувате желбите на вашето дете во врска со голотијата. Тие треба да знаат дека ги почитувате нивните граници“, напоменува Ланг.
