Козјото млеко не се препорачува за бебиња (доенчиња), исто како што не се препорачува ниту кравјото, ниту кој било друг вид чисто животинско млеко. Ова млеко има висока концентрација на минерали и протеини, но содржи помалку фолати отколку што е потребно за нутритивните потреби на детето. Некои студии исто така укажуваат дека чистото козјо млеко е поврзано со високи стапки на анемија. Ниската содржина на фолати може да доведе до мегалобластна анемија.
Иако козјото млеко не е безбедно за доенчиња, некои лекари препорачуваат формули (адаптирано млеко) на база на козјо млеко. Тие можат да бидат безбедни од раѓањето до наполнета една година. Сепак, треба да избегнувате свежо козјо млеко и секое друго чисто животинско млеко во првите 12 месеци од животот на детето.
Откако детето ќе наполни една година, можете да започнете со воведување на козјото млеко во неговата исхрана, но мора да се консултирате со вашиот лекар за да бидете сигурни дека бебето ги добива сите потребни хранливи материи. Вкусот и мирисот на козјото млеко се разликуваат од кравјото, што на некои деца може да не им се допадне.
Зошто да го земете предвид козјото млеко? Тоа е одличен извор на протеини и калциум. Студиите укажуваат дека е добар извор и на витамин Б1, хлор и фосфор. Иако истражувањата сè уште траат, одредени биоактивни компоненти во козјото млеко (како антиоксидантите и специфичните масни киселини) се поврзуваат со подобра метаболна заштита. Редовното консумирање како дел од балансирана исхрана на постаро дете може да придонесе кон намалување на ризиците од воспалителни процеси и поддршка на имунолошкиот систем.
Откако детето ќе наполни една година, можете да започнете со воведување на козјото млеко во неговата исхрана, но мора да се консултирате со вашиот лекар за да бидете сигурни дека бебето ги добива сите потребни хранливи материи
Козјото млеко помага да се намалат нивoата на холестерол. Ако вашето дете има високи нивоа на холестерол во артериите и жолчното кесе, можеби ќе сакате да размислите за користење козјо млеко. Козјото млеко има приближно половина од концентрацијата на холестерол во споредба со кравјото млеко. Можете да му давате козјо млеко на вашето дете за да помогнете да се одржи внесот на заситени масти и нивото на холестерол под контрола.
Нутритивна споредба меѓу козјото и кравјото млеко
Козјото млеко има повеќе протеини и масти во споредба со кравјото. Исто така, содржи повеќе калиум, витамин А и калциум, кои се клучни за растот на вашето дете. Генерално има помалку натриум и јаглехидрати.
- Лактоза: Козјото млеко содржи лактоза исто како и кравјото. Ако вашето дете е интолерантно на лактоза, треба да размислите за растителни млека (од соја или бадем).
- Дигестија: Козјото млеко е полесно за варење од кравјото.
- Недостатоци: Протеинот во козјото млеко е сличен по структура со оној во кравјото, што значи дека и двете можат да предизвикаат алергиски реакции кај децата. Во тој случај, козјото млеко не е безбедна алтернатива. Исто така, тоа потешко се наоѓа во продавниците и може да биде поскапо.
Кога козјото млеко е безбедно? Размислете за соодветни формули на база на козјо млеко ако вашето бебе е под 12 месеци. Најдобрата формула треба да биде збогатена со минерали и витамини. Консултирајте се со вашиот педијатар, кој може да препорача суплементација со витамин Д доколку истиот недостасува во формулата. Козјото млеко содржи значително помалку витамин Б12 и фолна киселина од кравјото млеко.
Ако вашето бебе е чувствително на кравјо млеко, понудете му козјо млеко како алтернатива, но имајте предвид дека ако детето е алергично на протеинот од кравјо млеко, постои шанса да биде алергично и на протеинот од козјо млеко. (WebMD)
