Иако се нарекуваат утрински, мачнините во бременоста и не мора да се појават само наутро. Бремената жена може да ги има и чувствува во кој било период од денот. За многу жени, токму мачнините се првиот симптом за бременост, а обично се јавуваат пред 9. недела од бременоста. Кај поголемиот број трудници, состојбата исчезнува и се смирува до вториот триместар, но не е исклучено да трае и подолго.
Утринските мачнини може да бидат благи – мачнина која трае кратко во текот на денот и ретко доаѓа до повраќање, или посилни – трае по неколку часа дневно и трудниците повраќаат повеќе од два пати во денот.
Заедно со мачнините, кај трудницата може да се јави и интолеранција на одредена храна, напивки или мириси.
Мачнината и повраќањето обично не се штетни по фетусот, а некои истражувања дури и покажуваат дека колку е посилна утринската мачнина, толку е помал ризикот од спонтан абортус. Исто така, постојат некои податоци кои укажуваат дека трудниците кои носат женско дете почесто имаат мачниниод оние кои носат машко дете.
По прашање на мачнините, нема многу што може да се направи, но од помош ќе биде ако наутро по станување консумирате сув тост, двопек или крекери, ако внесувате доволно течности и јадете почесто, но помали оброци кои не се масни. И чајот од ѓумбир може да ги смири овие мачнини.
