За каков осип станува збор?
Бебињата при никнување на забите, многу се лигават. Таа плунка содржи и парчиња храна со ензими за варење кои делуваат надразнувачки на нежната кожа на бебето и предизвикуваат осип, објаснува педијатарката Кендис Џонс. Овој осип се јавува кај бебињата помеѓу 6. и 24. месец од животот, а тоа е всушност периодот кога растат забите.
Како изгледа овој осип?
Осипот обично се опишува како црвен, рапав со мали пликови, а понекогаш се јавува и испукана кожа. Осипот може да биде и со непријатен мирис. Тој со тек на време ќе се намалува, бидејќи како поминува време, бебето се помалку ќе се лигави.
Осипот најчесто се јавува на образите, устата, брадата и на вратот. Во некои случаи, може да се појави и на горниот дел на градите.
Постојат ли и други осипи кои вака изгледаат?
Осипите може да бидат предизвикани од различни вируси и обично се поврзани со температура. Може да се појават било каде на телото. Осипот кој се појаваува поради лигавање, не предизвикува температура – иако растот на забите понекогаш се поврзува со мал пораст на телесната температура (под 38 степени), што и не се смета за вистинска температура. Егземата, позната и како атописки дерматитис, може да предизвика црвени дамки и да се појави било каде по телото, особено зад колената и ушите, на прегибите на лактовите и на рацете. Најдобро е педијатар да процени што го предизвикува осипот, доколку не сте сигурни.
Како се спречува овој осип?
Најдобро е нежно и често да се брише плунката со мека крпа. Ако маицата на бебето е мокра, задолжително променете му ја. Важно е пределот каде е осипот да се држи сув што е можно повеќе. Може да нанесете и бебешка крема за да се направи бариера за заштита на кожата.
