Дали вашето дете покажува интерес да ги научи буквите? Дали сака само да разгледува книги и списанија? Дали сака да „пишува“ со молив или пенкало? Дали внимателно слуша за време на читање приказни?
Ако одговорот е „да“, тогаш можеби е подготвено да ги научи основите на читањето. Ако не, тоа е сосема нормално – повеќето деца на предучилишна возраст сè уште не се подготвени. Веројатно ќе им биде потребна уште една или две години за да ги развијат јазичните вештини, визуелната перцепција и меморијата што се потребни за почеток на формално читање.
Дали моето четиригодишно дете треба да чита?
Иако некои четиригодишници навистина сакаат да научат да читаат и почнуваат да препознаваат одредени познати зборови, нема потреба да го форсирате вашето дете. Дури и ако успеете да му дадете предност пред другите деца, тоа не значи дека секогаш ќе има голема корист од тоа кога ќе тргне на училиште. Некои деца што рано научиле да читаат ја губат предноста во второ или трето одделение, кога и другите ученици ги совладуваат истите основни вештини.
Направете го читањето забавно, а не присилно
Најважниот фактор што ја одредува успешноста на едно дете во училиште е неговиот ентузијазам за учење, а не тоа колку било форсирано од мали нозе. Направете учењето да биде забавно, а не под присила. Поттикнете го ентузијазмот на вашето дете за учење – тоа е поважно отколку возраста на која ќе научи да чита.
Некои деца што рано научиле да читаат ја губат предноста во второ или трето одделение, кога и другите ученици ги совладуваат истите основни вештини
Кој е најуспешниот пристап кон раното учење? Оставете го вашето дете само да го одредува ритамот и да ужива во процесот. Не го заморувајте со вежбање букви, броеви, бои, форми или зборови. Наместо тоа, поттикнете ја неговата љубопитност и желба за истражување. Читајте му ги книгите што ги сака, но не инсистирајте да ги учи зборовите. Обезбедете му едукативни искуства, но истовремено потрудете се тие да бидат и забавни.
Направете учењето да биде забавно, а не под присила. Поттикнете го ентузијазмот на вашето дете за учење – тоа е поважно отколку возраста на која ќе научи да чита
Кога вашето дете е подготвено да учи букви
Кога вашето дете ќе биде подготвено да учи букви и читање, постојат многу корисни алатки – едукативни телевизиски програми, игри, песни… Но, не очекувајте децата сами да ја завршат работата. И вие треба да бидете вклучени.
Ако гледа едукативна ТВ-програма, на пример, седнете со него и разговарајте за прикажаните концепти. Ако користи компјутерска програма, работете заедно за да бидете сигурни дека е соодветна за неговите способности. Ако играта е премногу тешка и разочарувачка, може да го намали неговиот интерес и да ја уништи целта. Запомнете – активното учење во топла, поддржувачка средина е клучот за успех.
(Извор: Американска академија за педијатрија)
