Многу родители се зацрвенуваат побрзо од децата кога на ред доаѓа разворот за репродуктивното здравје, а тоа е тема која не смее никако да се игнорира. Неодамна спроведена студија во Велика Британија покажала дека разговорот меѓу родителите и децата за сексот може многу да им помогне на тинејџерите, а психијатрите понудиле неколку корисни совети како да го водат овој разговор.
Истражувачите од Лондонското училиште за хигиена и здравје спровеле обемна студија во која анкетирале 2.625 млади луѓе за нивното прво сексуално искуство, како и за околностите во кои се наоѓале. Резултатите се објавени во списанието Sexual & Reproductive Health.
На испитаниците им биле поставени четири прашања:
- Дали користеле контрацепција?
- Дали во половиот однос се впуштиле доброволно, или чувствувале одреден притисок од околината?
- Дали и тие и партнерот биле подеднакво подготвени да го направат тоа?
- Дали првиот сексуален однос се случил во вистинскиот момент?
Со помош на овие прашања научниците сакале повеќе да дознаат за согласноста, заштитата, сигурноста и заинтересираноста за сексуалниот однос. Воопшто не биле изненадени од резултатите кои покажале дека повеќе испитаници не биле одушевени од своето прво сексуално искуство, 40 проценти од жените и 26 проценти од мажите сметале дека тоа не се случило во вистинското време, додека 17,4% девојки изјавиле дека и тие и партнерите не сакале секс во исто време. Девет од десет жени користеле контрацепција.
Резултатите покажале дека лицата кои биле помлади кога го имале своето прво сексуално искуство, подоцна се покајале и сметале дека требале да причекаат. Дури 78% жени кои за прв пат имале сексуален однос на 13 или 14 години, признале дека не биле подготвени. Истото го кажале и 65% од момчињата. Триесет и шест проценти од девојките кои првиот сексуален однос го имале од 18 до 24 години, се чувствувале исто. Се покажало и дека младите жени кои разговарале за сексот со родителите пред првиот сексуален однос, имале подобро искуство.
Врз основа на ова истражување, научниците ги советуваат родителите да им се посветат повеќе на децата и да им помогнат да откријат дали се подготвени за навлегување во сексуалниот живот.
Совет до родителите да им ги постават следниве прашања на децата:
- Дали чувствуваш дека ја правиш вистинската работа?
- Дали го сакаш твојот дечко/девојка?
- Дали тој те сака тебе?
- Знаш ли да користиш заштита?
- Дали си во состојба да кажеш „не„ во било кој момент, ако се предомислиш?
- Чуствуваш ли било каков притисок од страна на партнерот или пријателите?
- Дали си сигурен дека нема да зажалиш подоцна?
- Дали можеби сексот е само начин да ги импресионираш пријателите?
- Можеби со секс сакаш само да го задржиш дечкото/девојката?
Сите овие прашања треба внимателно да му ги поставите на детето. Доколку му е непријатно да зборува со вас, дозволете му да ги напише одговорите. Психолозите тврдат дека раното сексуално искуство може да има долготрајно влијание на сексуалното здравје. Поради тоа е важно родителите сеирозно да го сфатат овој разговор.
