Веќе неколку пати сме пишувале за тоа кое годишно време, календарски месец, па дури и кој ден од годината е најповолен за „работа на бебе“, односно кога се зачнуваат најмногу деца. Според статистиките, најмногу деца се раѓаат на почетокот на есента, најчесто во септември.
Но, дали некогаш сте се запрашале – кои точно датуми во годината се „најпопуларни“ за раѓање на бебиња? Весникот Њујорк Тајмс уште во 2006 година објави дека во периодот од 1973 до 1999 година, според истражување на Харвард, најчест датум на раѓање во САД бил 16 септември. Но, поновата анализа на Мет Стајлс, која опфаќа податоци од 1994 до 2014 година, покажува дека најчест роденден е 9 септември.
Иако списанието Тајм неодамна потврди дека 9 септември е најпопуларниот роденден, историски гледано и 16 септември е мошне блиску до врвот – и тоа не само во САД, туку и на глобално ниво. Најпопуларниот точен датум варира од деценија во деценија, но општиот заклучок е дека септември е најчестиот месец за раѓање. Според поновите податоци, дури 9 од 10 најчести датуми на раѓање се помеѓу 9 и 20 септември.
Ако земеме предвид дека бременоста во просек трае околу 38 недели, тоа значи дека поголемиот дел од овие бебиња се зачнати во декември – токму за време на празничниот период.
Национален ден на зачнување
Според најновите податоци од Велика Британија, најмногу бебиња таму се раѓаат на 26 септември, што е точно 38 недели по 2 јануари. Поради ова, 2 јануари во Велика Британија е неформално прогласен за „национален ден на зачнување“.
Зимските месеци се помалку популарни
Списанието Тајм објави и кои се најнепопуларните датуми за раѓање. Според статистиките, најмалку деца се раѓаат во зимските месеци: декември, јануари и февруари. Посебно непопуларни се 25 декември (Божиќ), 1 јануари и, се разбира, 29 февруари.
Ова можеби укажува дека многу родители свесно планираат кога ќе им се роди детето – или пак, дека во периодот на празници лекарите се на одмор, па закажаните породувања (како царски рез или индуцирано породување) се преместуваат на денови кои не се празнични.
