Данска целосно ќе престане да ја користи вакцината АстраЗенека против COVID-19 поради можна причинско-последична поврзаност помеѓу вакцината и формирањето на тромби, објавија денеска неколку дански медиуми, повикувајќи се на неименувани извори. Поради одлуката да престане да се користи оваа вакцина, програмата за вакцинација во Данска ќе доцни неколку недели, објави ТВ 2.
Европската агенција за лекови (ЕМА) минатата недела објави дека е идентификувана можна врска помеѓу вакцината и згрутчување на крвта во ретки случаи, но дека ризикот од смрт од COVID-19 е „далеку поголем“ од ризикот од смрт поради ретки несакани ефекти.
- На 11 март, Данска привремено ја прекина вакцинацијата со АстраЗенека против COVID-19 по извештаите за случаи на згрутчување на крвта, од кои еден тогаш беше пријавен и во земјата. Исто така, ја стави „на чекање“ и вакцината на Џонсон и Џонсон поради истата причина
„Данска е првата земја која потполно ја исфрли од употреба вакцината против COVID-19 на АстраЗенека“, потврди Тања Ерихсен од Данската агенција за лекови подоцна на прес конференција.
