Видот на симптоми зависи од причината на самата срцева болест, интензитетот на болеста и возраста на детето.
Симптомите на срцевите болести кај децата значајно се разликуваат од симптомите кај возрасните, пред се поради тоа што срцевите болести кај децата се побројни, а притоа и различно се манифестираат во различни возрасни групи.
За симптомот да може да се воочи, лекарот ( и родителот) мора да знаат како изгледа здраво дете, односно како се однесува на оние нивоа каде се препознаваат симптомите на самата срцева болест. Особено е тешко да се препознаат тие симптоми кај новородено дете.
ТАХИКАРДИЈА И БРАДИКАРДИЈА
Новороденче се смета дете на возраст до еден месец. Новороденче има нормална срцева фреквенција 120-160/мин. Секоја тахикардија (фреквенција над 160/мин), особено фреквенција на срцето над 180/мин, е знак за можна срцева инсуфициенција.
Поради тоа, лекарите, а и родители се должни на секое дете кај кое се сомневаат на срцева болест да му ја измерат срцевата фреквенција, односно пулсот. Освен тахикардија која означува можна срцева инсуфициенција и брадикардијата исто така е знак за можна сериознаб болест.
На пример, ако детето има отчукувања на срцето од само 60 / мин, тоа е знак за сериозно нарушување на срцевиот ритам. Во некои околности ова може да значи сериозна опасност за детето, бидејќи тоа е таканаречен целосен атриовентрикуларен блок.
Затоа, и лекарот и родителот мора да го измерат отчукувањата на срцето и треба да се очекува пулс од 120-160/мин кај здраво дете. Се разбира, покрај самата фреквенција, срцева болест претставуваат и аритмиите, односно неправилна работа на срцето. Тие се бројни и можат да имаат различно значење, затоа во таков случај треба да побарате мислење од лекар.
Обрнете внимание на забрзаното дишење
Друг голем симптом што може да се појави при срцева слабост или срцеви заболувања кај децата е забрзаното дишење – тахипнеа. Нормалната фреквенција на дишење за време на неонаталната возраст е 40-60/мин. Повеќето сериозни срцеви заболувања, особено срцевата слабост, е проследена со забрзано дишење. Покрај тоа, се јавува и отежнато дишење, кое се нарекува тахидиспнеа.
ОСТАНАТИ СИМПТОМИ НА БОЛЕСТИ НА СРЦЕТО КАЈ ДЕЦАТА
Освен овие основни симптоми на срцеви заболувања, постојат голем број други симптоми кои можат да се препознаат во сите возрасни групи. Цијанозата значи сина боја на кожата и слузницата. Тоа е последица на аномалии во самото срце што е причина за мешање на артериската и венска крв. Бледата боја на кожата, од друга страна, е симптом што се јавува кај други срцеви болести и аномалии, така што овие се важни знаци за диференцијална дијагноза кај големите групи на срцеви заболувања. Зголеменото потење може да биде резултат на срцева слабост. Условено е од засилено влијание на хормоналниот систем на самиот организам на детето, кое се обидува да го подобри функционалниот капацитет на инаку ослабеното срце.
