Родителството е предизвикувачко и не постои совршен рецепт. Но, искреноста, прифаќањето, личната грижа и присуството можат да направат голема разлика – не само за нашите деца, туку и за нас самите. Бидејќи додека нив ги учиме како да бидат среќни и успешни, истовремено учиме и ние – како да бидеме понежни, потрпеливи и поприсутни родители.
Експертката Гречен Рубин споделува неколку клучни лекции што ги научила низ годините родителство – честопати преку сопствените грешки.
- Не мора секогаш да ги тешите
Рубин вели дека ѝ требало долго време да сфати колку е неефикасно да им кажува на децата работи како: „Не е тоа ништо!“, „Погледни од ведрата страна!“ или „Ти не се плашиш од кловнови!“ Иако се обидуваме да ги утешиме на овој начин, децата всушност се чувствуваат несфатени.
Со текот на времето, таа забележала дека им било многу полесно кога би рекла: „Звучи како испитот многу те потресе“, „Тој коментар навистина те повредил“ или „Не е лесно да се научи таблицата за множење“. По некое време, ѝ станало јасно – не им помагаме на луѓето кога ја игнорираме нивната тага, туку кога ја признаваме.
- Љубовта се покажува преку прифаќање
Рубин сподели како едно нешто ја мачело долго време како родител. „Ги сакам моите ќерки безусловно и не сакам да се променат, но сепак постојано ги охрабрувам да бидат подобри, поуспешни, поефикасни.“
На крајот, таа вели дека сфатила дека вистинската љубовистовремено е и безусловна и бара многу. Љубовта го прифаќа детето какво што е, но исто така верува во неговиот потенцијал – и затоа го охрабрува да расте.
- Кога сте нежни кон себе, станувате подобар родител
Тешко е да се прифати фактот дека не можеме да ги принудиме другите да се променат. Рубин истакнува дека како мајка открила нешто многу важно – кога таа се променила, се променил и нејзиниот однос со нејзините деца.
„Кога повеќе се одмарав, бев помалку раздразлива. Кога си дадов повеќе време и престанав да брзам, бев поприсутна. Кога успеав да го задржам смисолот за хумор – моите деца станаа посмирени, поопуштени, повесели.“
„Не можеме да ги промениме другите, но кога се менуваме себеси, и нашите односи се менуваат – а потоа понекогаш се менуваат и другите“, вели таа.
- Ценете го секој момент – децата растат побрзо отколку што мислиме
Таа научила една од најважните лекции за родителство кога нејзините ќерки биле сè уште мали. „Постојано го чувствував истиот парадокс: еден напорен ден ми се чинеше бесконечен, а годините поминуваа за миг.“
Се сеќавам како лежев во кревет наутро, размислувајќи колку многу требаше да направам пред да се вратам во истиот кревет навечер. И потоа ќе дојдеше Денот на трудот, па за миг повторно ќе беше Денот на благодарноста, Нова Година и повторно Денот на трудот.“
Рубин издвојува една реченица што често им ја повторува на родителите: деновите се долги, но годините се кратки.
