Детската кашлица може да значи многу различни нешта, а детето понекогаш е премало за да ви каже што точно го мачи и како се чувствува. Родителите често се прашуваат дали треба да почекаат, да се јават кај лекар или веднаш да заминат на итна помош.
Кашлицата е начин на кој телото се штити себеси, објаснува д-р Хауард Балби, директор на клиниката за детски заразни болести во Њујорк. Таа служи за одржување на дишните патишта чисти и може да биде сува или влажна.
Сувата кашлица најчесто се јавува при настинка или алергиска реакција, додека влажната кашлица обично укажува на респираторна болест проследена со бактериска инфекција.
Децата помлади од четири месеци ретко кашлаат, па ако се појави кашлица во тој период, тоа може да укажува на посериозна состојба, предупредува д-р Кетрин Дундон од Медицинскиот факултет при универзитетот Вандербилт.
Во продолжение, насоки кои ќе ви помогнат да процените кога е потребна лекарска помош.
Кашлица при настинка
Кога детето има настинка, кашлицата најчесто е сува и е проследена со затнат нос, болки во грлото и течење на носот. Потребни се одмор и внес на повеќе течности.
Амерканската академија за педијатрија препорачува деца помлади од шест години да не користат сирупи против кашлица, бидејќи тие немаат докажан ефект кај нив. Наместо тоа, може да помогне мед (кај деца постари од една година) и природни препарати.
Ако температурата е над 37°C и детето изгледа болно – консултирајте лекар. Доколку станува збор за бебе помладо од четири месеци со температура, потребна е итна консултација.
Кашлица што укажува на круп
Крупот е акутно воспаление на горните и долните дишни патишта, најчесто предизвикано од вирусот параинфлуенца тип 1. Се манифестира со карактеристична „лаечка“ кашлица и отежнато вдишување.
Ако кашлицата звучи продорно и наликува на лаење, особено ноќе, потребна е лекарска проценка. Најчесто ги погодува децата под пет години и обично трае три до четири дена. Ако трае подолго – посетете лекар.
Влажниот воздух може да помогне – користете овлажнувач или дозволете детето да вдишува пареа во затворена бања.
Кашлица што укажува на бронхиолитис
Акутниот бронхитис е воспаление на дишните патишта што најчесто следи по инфекција на горниот респираторен тракт.
Педијатарот д-р Руфин Франклин објаснува дека кај бебињата под една година, бронхиолитисот најчесто е предизвикан од респираторниот синцицијален вирус (РСВ). Овој вирус кај поголемите деца предизвикува блага настинка, но кај новороденчиња може да биде сериозен, предупредува д-р Давид Рубин од болницата Св. Барнабас Хоспитал.
Се јавува по настинка, со кашлица и течење на носот, најчесто во есен и зима. Важно е внимателно да се следи дишењето. Ако стане забрзано и отежнато – веднаш побарајте лекарска помош.
Кашлица што укажува на голема кашлица (пертусис)
Пертусис е многу заразна бактериска болест предизвикана од Bordetella pertussis. Се карактеризира со силни напади на кашлање проследени со продолжен, „свирежлив“ вдишок.
Пред воведувањето на вакцината во 60-тите години, оваа болест била водечка причина за смртност кај доенчиња.
Ако се сомневате на голема кашлица, веднаш консултирајте лекар. Во одредени случаи е потребна хоспитализација и терапија со антибиотик еритромицин.
Кашлица што укажува на пневмонија
Пневмонијата е вирусна или бактериска инфекција на белите дробови. Детето ќе биде видно изморено, со влажна кашлица и жолто-зелен секрет.
Бактериската пневмонија е поопасна, па задолжително консултирајте лекар, особено ако има висока температура.
Кашлица што укажува на астма
Астмата е поретка кај деца под две години, освен ако постои семејна историја. Ако слушате свирежливо дишење заедно со кашлица – потребна е лекарска проценка.
Доколку бебето тешко дише или состојбата се влошува, веднаш јавете се кај педијатар.
Кашлица поради заглавено туѓо тело
Парчиња храна (како морков или јаболко) се чест причинител на гушење. Ако детето нагло почне да кашла или да се гуши додека јаде или игра со мали предмети, проверете ја устата.
Ако не може да дише, посинува или не може да исфрли воздух – веднаш применете мерки за прва помош и повикајте итна медицинска служба.
Во случаи на сомневање за заглавено туѓо тело, може да биде потребен рендген и бронхоскопија.
Кога да се обратите кај лекар?
Јавете се кај лекар ако:
- детето кашла, а е помладо од 4 месеци
- има сува кашлица и настинка подолго од 5–7 дена
- има влажна кашлица со температура
- кашлицата е проследена со свирежливо дишење
Побарајте итна помош ако:
- детето не може да дојде до воздух
- има силен свиреж при дишење
- не може да искашла секрет
- добива синкаста боја
