„Џонсон и Џонсон“ најверојатно до септември ќе имаат достапна вакцина против Ковид-19 наменета за деца под 18 години, изјави извршниот директор Алекс Горски.
„Мислам дека веројатно ќе се случи точно во тој временски рок. Добрата вест е дека ФДА веќе работи со компаниите за да воспостават јасни регулаторни упатства, за да може да се соберат соодветни податоци“, рече Горски.
Тој вели дека една придобивка од вакцината на „Џонсон и Џонсон“ е што овој посебен вид на вакцини бил користен и во пониски возрасни групи и порано.
„AdVac 26 беше широко користен кај повеќе возрасни групи, млади и стари во Африка кога го развивавме ова за други состојби како што се ебола и ХИВ. Затоа, тоа ни дава причина да бидеме оптимисти во врска со безбедносниот профил во таа популација на пациенти, но сепак, мораме да ја завршиме клиничката работа“, рече тој.
Една придобивка од вакцината на „Џонсон и Џонсон“ е што овој посебен вид на вакцини бил користен кај пониски возрасни групи и порано
Минатата недела, „Џонсон и Џонсон“ прво ги објавија своите планови за проучување на вакцината кај адолесценти. Горски вели дека ќе започнат со тестирање кај луѓе на возраст од 12 до 18 години и потоа ќе се спуштаат надолу со возраста.
„Ќе спроведеме неколку студии за имуногеност и безбедност кај деца од 17 години па надолу, се до новороденчиња“, рече доктор Макаја Дуогуих од Џонсон и Џонсон, пред советодавниот комитет на Американскиот центар за контрола и превенција на болести минатата недела.
„Исто така, предвидена е студија за бремени жени во второто и третото тромесечје кон крајот на март или почетокот на април“, додаде д-р Дуогуих. „Исто така, планираме да започнеме и студија кај имунокомпромитирани лица во третиот квартал на оваа година“.
И „Фајзер“ и „Модерна“ во моментов ги испитуваат своите вакцини против Ковид-19 базирани на mRNA кај деца. (Си-Ен-Ен)
