Во брзиот свет исполнет со рокови и обврски, добрината понекогаш може да изгледа како луксуз. Сепак, тоа е една од најважните вредности што родителите можат да им ја всадат на своите деца, и не се учи само преку големи гестови како донирање за хуманитарни цели, туку преку мали, секојдневни навики кои го обликуваат карактерот.
Што всушност е добрината?
Добрината е морална вредност и темел на личниот раст. Таа започнува со мали, повторувачки навики кои се негуваат дома. Семейната средина е првата училница во која децата учат што значи емпатија, сочувство и великодушност.
Родителите се првите и најважни модели. Начинот на кој меѓусебно комуницирате и решавате конфликти, децата внимателно го набљудуваат и подоцна го имитираат. Затоа е клучно добрината да стане дел од вашата секојдневна семејна рутина, бидејќи така не се создава само моментален впечаток, туку се обликува карактерот на детето за целиот живот.
Започнете го денот со гест на добрина
Јутрата често се хаотични, исполнети со брзање околу подготовка на појадок и тргање на училиште. Но, дури и во таа бркотница, можете да најдете момент за добрина. Поттикнете го детето да го започне денот со споделување нешто за што е благодарно или зададете му мал „цел на добрина“ за тој ден.
Покажете емпатија во мали нешта
Децата учат за емпатијата набљудувајќи ве вас. Кога ќе кажете „фала“ на доставувачот, кога ќе разговарате со почит кон продавачот или ќе покажете трпение кон соседите, ги учите дека секој заслужува љубезност. Почитта која ја покажувате кон другите, од домашната помошничка до сопругот, вашето дете ќе ја пренесе на своите врсници и наставници.
Домашните работи претставете ги како грижа за семејството
Наместо да ги прикажувате домашните обврски како казна или задолжување на една личност, претставете ги како заеднички придонес во семејството. Вклучете го детето во поставување на масата или средување на својата соба. Таквиот пристап ги претвора должностите во можности за учење одговорност и меѓусебна почит.
Нека добрината биде забавна
Вклучете го детето во хуманитарни акции во заедницата или училиштето. Поттикнете го да донира стари играчки и облека или да пишува благодарници до луѓето што му помагаат секојдневно. Претворете ги овие мали дела во нешто позитивно и пофалете го трудот. На тој начин детето активно и лесно ќе ги усвојува вредностите на добрината.
Научете го детето да биде добро и кон себе
Да се биде добар кон другите е важно, но исто толку клучно е да се научи детето да биде добро и кон себе. Родителите треба да ја нормализираат грижата за себе и сочувството. Говорете позитивно за себе, прифатете ги грешките како можности за учење и немојте да се потценувате. Кога децата ќе видат дека родителите се нежни кон себе, сфаќаат дека добрината не е насочена само надвор, туку и кон внатре.
Учeњето добрина е процес. Тоа не е теорија која детето може да ја научи напамет, туку секојдневна практика. Бидете упорни и запомнете дека добрината е навика со која живееме. Секое „те молам“, секој трпелив момент и секој внимателен чин ги гради темелите на карактерот на вашето дете.
