Ако се чини дека објавите за бременост доаѓаат една по друга од блиска група пријателки, истражувањата покажале дека има причина и за тоа: Бременоста може да биде заразна!
Повеќето од нас сигурно се сеќаваат на некој пример или анегдота поврзана со темата „заразна“ бременост. Постојат многу пријателки кои биле бремени заедно, па дури и оние кои се породиле во период од неколку дена, а сега знаеме дека постои и научен доказ за тоа.
„Бременоста на пријателката позитивно влијае на желбата за дете“
„Бременоста на пријателката позитивно влијае на желбата да се има дете“, заклучиле авторите на студија од 2014 година објавена во научното списание American Sociological Association.
За лонгитудиналната студија, истражувачите анализирале податоци од 1.720 жени во САД од средината на 1990-тите до средината на 2000-тите. Со оглед дека повеќе од неколку децении следеле жени кои во 1995 година имале најмалку 15 години – откриле дека половина од интервјуираните жени родиле дете до времето кога биле спроведени последните интервјуа, т.е. до 2008 година.
За време на многуте интервјуа, жените бележеле пријателства, што им дало на истражувачите увид во нивните пријателства додека старееле. Тие особено се фокусирале на најдобрите другарки од средно училиште кои останале пријатели низ сите години подоцна и откриле дека постои силен елемент на „зараза“ кога станува збор за планирана бременост.
Постојат три теории
„Откривме дека овој ефект започнува за време на бременоста на пријателката, почнува да се зголемува откако пријателката ќе се породи и го достигнува својот врв во текот на две години по раѓањето на детето“, напишале авторите на студијата.
Нарекувајќи го тоа „ефекти на плодноста“ – истражувачите веруваат дека постојат три теории за тоа зошто бременоста е „заразна“ меѓу женските пријателки: социјално учење, социјално влијание и споделување на трошоците.
Имено, жените се повеќе наклонети кон мајчинството доколку видат дека нивната блиска пријателка успешно се справува со тоа. Од друга страна, жените не сакаат да се чувствуваат како да „заостануваат“ ако нивните пријателки колективно станат мајки. И третата работа, има неколку финансиски придобивки кога пријателите можат заедно да ги координираат активностите и да ги споделат трошоците за децата.
