♦♦♦♦♦♦♦
Како функционира Универзитетска клиника за детски болести во услови на пандемија со коронавирус, кои се мерките што треба да ги преземат родителите за да ги заштитат своите деца и каде се упатуваат фебрилните дечиња или оние кои имаат симптоми коишто укажуваат на можност од постоење на коронавирусна инфекција?
„Коронавирусната инфекција е се уште присутна и таа е насекаде околу нас. Децата како пациенти релативно лесно ја поминуваат оваа инфекција, во голем дел се асимптоматски или со лесна клиничка слика. Мал е процентот на деца коишто имаат навистина тешки и сериозни компликации како резултат на оваа инфекција. Затоа сите треба да бидеме свесни за постоењето на оваа инфекција и како родители треба да ги обучиме како треба да се заштитуваат во оваа состојба“, објасни доц. д-р Наташа Најдановска-Алулоска, специјалист педијатар и директорка на Детска клиника, во утринската ТВ-програма „Ја сакам Македонија“ на Сител.
Родителите треба со сопствен пример да ја покажат имплементацијата на мерките коишто се препорачани за спречување на оваа инфекција, вели д-р Најдановска-Алулоска. „Значи да ги научат децата на еден ненаметлив, позитивен начин, со позитивен пример секогаш да одржуваат дистанца, потоа да носат маска на лицето, маската да ја носат правилно, често и долготрајно да ги мијат рацете, а кога тоа не е можно да ги дезинфицираат рацете“.
Како функционира Универзитетската клиника за детски болести во услови на пандемија со коронавирус
„Децата се прегледуваат во два дела на нашата клиника – тоа е сутеренот на клиниката, како и анексот на клиниката. Во нив се сместени нашите амбуланти, постои посебен протокол за прегледување во услови на ризик од коронавирусната инфекција. Тој протокол значи дека на влезот на овие две простории стои овластено лице од клиниката коешто со бесконтактен топломер мери температура на детето и на родителот којшто е придружник. Ги советуваме родителите да доаѓаат по еден придружник за еден пациент, секогаш да носат маска на лицето, исто како и детето ако е над двегодишна возраст. Понатаму, ова овластено лице на влезот на двете амбулантски простории освен што мери температура и внимава на точноста на позиционирање на оваа маска на лицето на детето и на придружникот, прави дезинфекција на нивните раце и ги советува да поминат низ дезобариерата за да ги дезинфицираат чевлите“, објаснува д-р Најдановска-Алулоска.
Останува препораката дека децата коишто се фебрилни или имаат други симптоми коишто укажуваат на можност од постоење на коронавирусна инфекција треба да се упатат на Институтот за белодробни заболувања-Козле. Секако претходно треба да го контактираат матичниот лекар и тој ќе ја каже патеката на движење
„Ги замолуваме родителите да ги почитуваат инструкциите коишто ги даваат вработените на клиниката во однос на тоа кога да влезат во амбулантските простори за да може да се одржи дистанца, некогаш кога е убаво времето и да почекаат и надвор пред да бидат повикани…“
Фебрилните деца се упатуваат на Институтот за белодробни заболувања-Козле
„Останува препораката дека децата коишто се фебрилни или имаат други симптоми коишто укажуваат на можност од постоење на коронавирусна инфекција треба да се упатат на Институтот за белодробни заболувања-Козле. Секако претходно треба да го контактираат матичниот лекар и тој ќе ја каже патеката на движење.
Доколку се случи да дете кое е тешко болно, а е сепак, суспектно за овие симптоми и не може да биде препраќано во друга институција, ние, сепак, имаме соба за изолација каде што можеме да ја спроведеме патеката за изолација за вакви суспектни случаи“, додава д-р Најдановска-Алулоска.
