Облекувањето на двегодишно и тригодишно дете понекогаш може да биде навистина стресно. Од тоа дека сака да го облече само она што ќе го замисли, до тоа дека не сака да носи јакна, облекува чизми среде лето или едноставно негодува штом се приближите до плакарот и ќе почнете да се подготвувате за некаде. Детските психолози советуваат како да се поставите во ваквите ситуации.
Пофалете го изборот на детето
Децата на оваа возраст сакаат одредена контрола, па дајте им ја. Оставете му на детето одредена слобода во изборот што ќе облече, но секако не целосна за да не бира костим за капење среде зима. Понудете му на детето две или три комбинации кои сте ги составиле, а тоа нека избере која ќе ја облече. Ако навистина сака да облече костим за капење среде зима, направете компромис и нека го носи под маицата, советуваат детските експерти за раст и развој.
Никогаш не го критикувајте изборот на детето и попрво пофалете го стилот, дури и ако е целосно несоодветен. Можете нежно да предложите која блуза може подобро да оди со тие панталони, но ако детето одбие, почитувајте го тоа.
Не грижете се што мислат другите
Некои деца упорно избираат да носат исто парче облека, кое често не стигнува ниту до машината за перење бидејќи детето постојано е во него. На родителите им е непријатно кога детето секој ден оди во градинка во иста блуза, но тоа не треба да ве оптоварува. Објаснете им на воспитувачите дека детето е во фаза кога сака да го носи само тоа парче облека и дека не се работи за ваша немарност. Во оваа ситуација, можете да купите неколку слични или исти маици или панталони кои му се допаѓаат на детето и да ги менувате секој ден. Продолжете да му нудите различна облека секој ден, но доколку одбие, прифатете го неговиот избор и запомнете дека и оваа специфична фаза на облекување ќе помине.
