Психологот Ејми Морин, авторка на книгата „13 работи што родителите на ментално силните деца никогаш не ги прават“, една работа ја издвојува како особено важна. Иако повеќето родители сакаат да воспитаат издржливи деца кои ќе знаат како да се справат со денешните проблеми и брзо да се опорават од неуспехот или поразот, понекогаш тие тоа целосно несвесно го саботираат.
Затоа, д-р Морин решила да открие кои работи никогаш не ги прават родителите на ментално силните деца, а истото им го препорачува и на другите. Таа тврди дека најважното нешто што овие родители го избегнуваат е да изигруваат жртви. Имено, менталитетот на жртва често е нешто што родителите го „собрале“ уште како деца, а потоа им го пренесуваат и на своите деца.
Како што објаснува психологот, исфрлањето од фудбалскиот тим, расправијата со пријателите или добивањето лоша оценка на тест не го прави детето жртва. Отфрлањето, неуспехот и неправдата се составен дел од животот со кои, вели Морин, сите мораме да се справиме. Наместо да им дозволат на своите деца да се сожалуваат себеси, родителите на ментално силните деца ги поттикнуваат да ги претворат своите борби во сила и да научат нешто ново од секој пораз.
Исто така, тие им помагаат на децата да препознаат начини на кои можат самостојно да преземат одредени позитивни чекори и да ги подобрат резултатите во која било област од животот и покрај негативните или тешките околности во кои се наоѓаат во тој момент.
