Времето за јадење може да стане вистинско борбено поле за родителите, особено ако детето е пребирливо со храната. Австралиски научници спровеле над 80 студии за да утврдат што да се прави со пребирливите деца. Тие утврдиле дека притисокот, наградувањето, како и родителските уцени и закани нема да помогнат. Од друга страна, ако семејството јаде заедно и ги вклучува децата во подготовката на храна, тоа ќе ја намали можноста за одбивање на некои намирници во чинијата.
“Ручекот вообичаено е стресен за родителите на пребирливите деца, бидејќи се обидуваат да создадат баланс помеѓу семејниот оброк и намирниците што нивните деца ги јадат. Кај некои, децата не сакаат зеленчук, а во други семејства, децата не сакаат одредени бои или текстури на оброците. Некои од тие преференци можат да се поврзат со карактерот на детето, но тоа е тешко да се промени. Сепак, постојат други фактори кои можат да ги намалат проблемите со исхраната на децата“, истакнува Лејн Чилман од Универзитетот Sunshine Coast во Австралија.
“Ако јадете заедно како семејство, вклучувајќи ги сите браќа и сестри, а оброкот е секогаш во исто време, тоа ќе ги намали шансите за негодување кај пребирливите деца. Исто така ќе помогне и ако децата учествуваат во подготовката на оброкот, било да изберат кое јадење ќе се подготви или пак да придонесат во спремањето. Но, ако на пребирливците им дозволите да гледаат телевизија додека јадат или им нудите награда ако изедат одредена намирница, тоа може негативно да влијае на нив“, додава Чилман.
Ана Кенеди од Универзитетот Јужна Австралија вели дека стресот поттикнува пребирливост кај децата.
“Кога имате дете кое е пребирливо, родителите доживуваат голем стрес. Тие се постојано загрижени дали детето добива доволно хранливи материи, доволно храна и дали добива тежина според возраста”, објаснува д-р Кенеди. Важно е да се разбере дека родителската загриженост и стресот можат дополнително да ја поттикнат детската пребирливост.
“Секој ќе има корист ако избегнувате лутина и ја ограничите негативната енергија за време на оброкот. Позитивното родителство, без оглед колку е тешко во одредени ситуации, е најдобриот чекор напред кога станува збор за пребирливи деца”, додава д-р Кенеди.
Научниците велат дека е важно да се применат неколку стратегии за да се „натера“ детето да го изеде оброкот, а тоа е , пред се добар пример. Јадете заедно како семејство.
Секогаш планирајте ги оброците во исто време бидејќи тоа го намалува стресот,а децата вклучете ги во нивната подготовка, бидејќи блискоста и чувството за контрола можат да помогнат. Намалете го стресот и негативните емоции за време на оброците, а секако не ги наградувајте, ниту казнувајте малите пребирковци.
