ПИШУВА:
Катерина Шекеровска-Димовска
katerina@pedijatar.mk
„Воодушевени сме! Беше неверојатно возбудливо да се видат целосни одговори само на достарлимаб кај секој лекуван пациент“, вели д-р Андреа Черчек, онколог во „Memorial Sloan Kettering Cancer Center“ во Њујорк и коавтор на трудот за клиничкото испитување на лекот достарлимаб, кое донесе фантастични резултати кај сите учесници во истражувањето, кај кои се повлече ракот, ексклузивно за „Педијатар.мк“.
Огромна надеж за болните од рак на дебелото црево донесоа резултатите од клиничкото испитување на новиот лек, кој се тестира за колоректален карцином и кој ги остави лекарите вчудовидени откако врати 100 отсто успешност во клиничките испитувања.
Достарлимаб, лек со лабораториски произведени молекули кои делуваат како заменски антитела во човечкото тело, ги остави истражувачите изненадени откако сите 12 учесници беа во ремисија една година по испитувањето на лекот. Огромен пробив, неверојатна вест во светот на онкологијата и медицината воопшто. Надеж за сите болни од оваа злоќудна болест, чии причини не се потполно јасни. Колоректалниот карцином е сериозно заболување, но може навреме да се открие со што се постигнува можност за негово целосно излекување. Почетокот на болеста е поврзан со развој на бенигни полипи, кои можат да се забележат и да се следат на редовните колоноскопии.
- Линк до трудот објавен во „New England Journal of Medicine“: PD-1 Blockade in Mismatch Repair–Deficient, Locally Advanced Rectal Cancer
Познати се ризик факторите како исхрана богата со црвено месо и масти, намален внес на влакна и зеленчук, намалена физичка активност и дебелина, пушење и генетски влијанија. Симптомите се скриени во раните фази на болеста, а најчестите причини зошто луѓето одат на лекар во подоцнежните фази на болеста се промени во динамиката на празнење на дебелото црево, ректално крвавење или траги од крв во столицата , промени во дебелината на столицата, како и чувство на надуеност, пропратено со болки во стомакот со општо чувство на малаксаност и пад во телесната тежина.
Д-р Андреа, честитки за вашиот неверојатен успех! Голем пробив! Клиничкото испитување спроведено од „Memorial Sloan Kettering Cancer Center“ покажа дека секој пациент со ректален карцином кој добил експериментален имунотерапевтски третман, неговиот рак отишол во ремисија! Најпрво би Ве запрашала, како се чувствувате знаејќи дека Вие и Вашиот тим му дадовте на светот голема надеж? За прв пат во историјата на ракот, сите 12 пациенти се ослободени од рак по експерименталното испитување на лекот достарлимаб. Дали резултатите беа изненадување и за Вас?
Д-р Андреа Черчек: Воодушевени сме! Беше неверојатно возбудливо да се видат целосни одговори само на достарлимаб кај секој лекуван пациент. Ги презентиравме ажурираните резултати во Американско здружение за клиничка онкологија – ASCO, и сега третиравме 14 пациенти и сите имаа целосен клинички одговор. Знаевме дека третманот ќе функционира добро, но бевме изненадени што функционираше толку добро кај секој пациент!
Немаше сериозни несакани ефекти од земањето на лекот, но студијата беше мала, само 12 пациенти, фокусирана на пациенти кои имаат редок генетски потпис во нивните тумори. Резултатите се ветувачки за иднината – целосна ремисија кај 100% од пациентите! Кој е Вашиот следен чекор? Дали испитувањето ќе се повтори во поголема студија?
Д-р Андреа Черчек: Да, ние ќе продолжиме да ги третираме пациентите на оваа студија и ќе отвориме поголема потврдна студија!
Што друго е важно да се истакне во овој момент?
Д-р Андреа Черчек: Ние, исто така, го проучуваме овој пристап на неоадјувантна PD-1 блокада кај сите цврсти тумори со недостаток на поправка на неусогласеност во рана фаза.
Ви благодарам за одвоеното време, Ви посакувам се најдобро и уште многу, многу успешни стории.
