Дел од експертите веруваат дека можеме да излеземе од овој кошмар веќе напролет
Надежите за крај на пандемијата на новиот коронавирус, што досега предизвика незамисливи штети, како во човечки жртви, така и на економски план, драматично се зголемија по веста за 90 % – ефикасност на вакцината против COVID-19 на компанијата „Pfizer“. Дел од експертите веруваат дека можеме да излеземе од овој кошмар веќе напролет.
И од ривалскиот табор, оној од Оксфорд, доаѓа реакција која може да донесе уште поголем оптимизам за враќање во нормала и конечен крај на пандемијата на коронавирус.
Имено, професорот Џон Бел од Универзитетот во Оксфорд, кој исто така учествуваше во развојот на вакцината на овој универзитет, истакнува дека вакцината на „Pfizer“ покажала неверојатно ниво на ефикасност.
„Тоа може да значи враќање во нормала до пролет. Јас сум првиот што го кажува тоа, но го кажувам смело“, изјави професорот Бел за Би-Би-Си.
Уште еден професор од Оксфорд со воодушевување ја поздрави веста на „Pfizer“.
„Таа вест ми измами насмевка од уво до уво. Олеснување е да се видат такви позитивни резултати на оваа вакцина, а тоа е добра работа и општо за вакцините против коронавируси. Секако, треба да видиме повеќе детали и да ги почекаме конечните резултати“, изјави професорот Питер Хорби, а пренесува „Гардијан“.
