Стиловите на родителство играат клучна улога во развојот на децата, а одредени стратегии можат да го зајакнат односот родител-дете. Според едукаторката за родителство и психолог, Џејми Блох, постојат едноставни, но многу ефикасни начини да се поддржат децата во нивниот раст, да се поттикне самостојност и да се изгради силна емоционална врска.
Блох ги издвојува шесте најефикасни стратегии за родителство. Еве што ги советува родителите.
- Знајте кога да се вклучите и кога да се повлечете
„Важно е да се научи кога е потребно да се вклучиме во животот на децата и да им дадеме поддршка, но и кога да се повлечеме и да им дозволиме на децата да преземат одговорност. Најдобрите родители се ускладени со своите деца и точно знаат кога треба да бидат поактивно вклучени, а кога е подобро да се набљудува оддалеку“, истакнува Блох.
- Бидете достапни
На децата повремено им е потребна поголема родителска поддршка, додека во други моменти се чувствуваат самостојни. Без оглед на тоа, важно е секогаш да бидете достапни за разговор и поддршка, дури и кога се чини дека децата се добро. Едукаторката додава дека редовните разговори и комуникацијата помагаат во одржувањето на поврзаноста.
- Фокусирајте се на чувствата, а не на решавањето проблеми
„Сите сакаме да ги решиме проблемите на нашите деца, но понекогаш е покорисно едноставно да слушаме. Ова значи да се биде присутен и да се слуша нивната болка, борби или разочарувања, без да се обидуваме веднаш да понудиме решение. Обидете се да ги препознаете и нормализирате нивните емоции и да помогнете тие се справуваат со непријатни чувства додека не бидат подготвени да го решат проблемот или да го пуштат“, советува Блох.
- Бидете доследни
Доследноста во љубовта, границите и сигурноста се неопходни за децата да се чувствуваат безбедно. Исто така, ја поттикнува довербата во врската, што ја олеснува дисциплината и го поддржува развојот и учењето.
- Најдете време за игра со децата
Едукаторката напоменува: „Најдете време, без разлика дали е еднаш неделно, двапати неделно или месечно, за квалитетно време поминато со децата. Тоа може да биде игра, возење со автомобил додека ја слушате нивната омилена музика или прошетка. Овие заеднички моменти овозможуваат отворена комуникација и им даваат на децата чувство на припадност и поврзаност“.
- Бидете цврсти, но љубезни
Да се биде цврст значи да поставите јасни очекувања и граници за вашето дете. Ова не значи да се биде строг, туку да се обезбеди структура и безбедност. „Децата најдобро напредуваат кога знаат што да очекуваат. Љубезноста вклучува сочувство и разбирање и помага да се изгради доверба и емоционална врска. Поставувањето граници во соработка со децата ги зголемува шансите за нивно прифаќање“, заклучува Блох.
