Децата сакаат да поминуваат многу време на сонце, но експертите предупредуваат дека никогаш нема доволно претпазливост при изложување на детската кожа на сонце. Тоа го покажало и последното истражување спроведено од Институтот за јавно здравје во Ирска, според кое девет од 10 ученици барем еднаш изгореле од сонце. Посебно загрижува фактот што дури 40 отсто од децата на возраст од 10 до 17 години добиле изгореници повеќе од четири пати.
Истражувањето опфатило повеќе од 10.000 деца, а резултатите Институтот за јавно здравје на Ирска ќе ги искористи за спроведување на Националниот план за превенција од рак на кожата.
Директорката на Институтот Хелен Мекавој признала дека резултатите од истражувањето ја шокирале. Мекавој предупреди на трендот на зголемување на ракот на кожата ширум светот, а она што, како што рече, ги прави резултатите од истражувањето особено загрижувачки е фактот дека децата кои биле изгорени од сонце најмалку три пати во детството имаат двојно поголем ризик да развијат рак на кожата во зрелоста.
Значи, иако ракот на кожата најчесто се дијагностицира на постара возраст, за тоа како да се заштити, треба да се размислува уште од мали нозе.
„Националниот регистар за рак предвидува дека бројот на заболени од рак на кожа ќе се удвои во следните 25 години. Точно е дека ракот на кожата најчесто се дијагностицира во 50-тите и 60-тите години, но да не ја заборавиме врската помеѓу ракот на кожата во зрелата возраст и изгореници заработени во детството“, вели Мекавој и додаде дека треба да се направи уште многу за да се подигне свеста како да се заштитиме од штетното влијание на сончевите зраци.
На пример, истражувањето покажало дека четири од пет деца користат заштитна крема, но не и други мерки за заштита од сонце. Помалку од 50 проценти од нив во лето носат заштитна облека (долги ракави и панталони) во лето, а уште помалку поминуваат време под сенка за време на највисокото УВ зрачење. Само 32 отсто од учениците се грижат да не се изложуваат директно на сонце во периодот од 11 до 16 часот. Исто така, интересно е да се забележи дека 17 проценти од нив никогаш не користеле крема за сончање.
Меѓутоа, она што е особено загрижувачко е бројката од три проценти од децата кои користеле солариум, иако неговата употреба во таа земја е забранета за лица помлади од 18 години. Не заборавајте, внимателноста кога станува збор за прекумерно изложување на сонце никогаш не е доволна. Децата од мали нозе треба да се научат да не излегуваат на сонце без заштитна крема која треба да се нанесува неколку пати на ден, особено после капење. Научете ги дека треба да носат и широка облека што го штити телото од сонце и покривка за глава (шапка или капа), да поминуваат што повеќе време под сенка, а пожелно е и да носат очила за сонце.
