Дваесет и шестгодишниот Нејтан Еџ од Менсфилд, Нотингем не може да го дочека моментот кога ќе стане татко, но бидејќи е слеп, не можел да го види своето неродено бебе на првиот ултразвучен преглед.
Сепак, благодарение на една своја пријателка, Нејтан добил извезена, тактилна фотографија од ултразвук со чија помош сега може да замисли како изгледа неговото дете.
„Колку е ова неверојатно! Денеска го добив ова прекрасно изненадување. Извезена фотографија од ултразвук на нашето бебе во 12-та недела од бременоста. Така сега со допир можам да замислам како изгледа нашето бебе”, напиша тој на Твитер каде што ја сподели фотографијата од подарокот кој го воодушеви.
Нејтан и неговата партнерка Ема Фотерингем ќе станат родители во мај. Нејтан изгубил 80 проценти од видот на шестгодишна возраст. После две неуспешни операции, тој целосно го изгубил видот на обете очи до 18-годишна возраст.
