Покрај заклучокот на Европската агенција за лекови дека придобивките од вакцината на АстраЗенека ги надминуваат ризиците и дека вакцината е безбедна и ефикасна, ЕМА објави и листа на симптоми за кои треба веднаш да се побара итна медицинска помош доколку се појават во рок од неколку недели по вакцинирањето:
- Краток здив
- Болка во градите или стомакот
- Отоци или чувство на студ во рацете или нозете
- Силна главоболка или заматен вид по вакцинацијата
- Крвавење кое не престанува
- Повеќекратни мали модринки, црвеникави или виолетови дамки, или плускавци со крв
На лекарите треба задолжително да им се каже информацијата за неодамнешното вакцинирање, додаваат од ЕМА.
Оттаму објаснуваат дека случаи на тромбоза и тромбоцитопенија, од кои некои се појавуваат како мезентерична венска тромбоза, церебрална венска тромбоза/церебрална венска синусна тромбоза, се забележани кај лица кои неодамна ја примиле вакцината на АстраЗенека, воглавно во рок од 14 дена по вакцинирањето. Поголемиот дел од случаите се однесувале на жени на возраст под 55 години, иако наведеното може да одрази и поголема изложеност на такви лица поради таргетирање на одредено население при спроведување на вакцинацијата во различни земји-членки на ЕУ, пренесува „Индекс.хр“.
