Експертот за родителство открива кои шест карактеристики се поврзани со децата кои имаат развиена висока емоционална интелигенција. Рим Рауда, експерт за родителство, го проучувала однесувањето на повеќе од 200 деца и дошла до заклучок дека оние кои се високо емоционално интелигентни имаат развиено одредени вештини.
Препознаваат невербални знаци
Децата со висока емоционална интелигенција се многу добри во сфаќањето на туѓите чувства само со набљудување на нивниот говор на тело и изразите на лицето. Експертот советува родителите да помогнат да се изгради оваа вештина преку водење рефлексивни разговори со децата за нивниот ден и емоциите што ги забележале кај луѓето со кои комуницирале. Таквите разговори ја зајакнуваат нивната способност за читање емоции и нивната доверба во разбирањето на другите.
Покажуваат емпатија и сочувство
Овие деца не само што ги препознаваат туѓите емоции, туку и покажуваат вистинска грижа и им нудат помош на другите околу нив. Како пример за такво однесување, експертката истакнува дека дете со висока емоционална интелигенција ќе се обиде да го утеши пријателот кој не победил во играта. Ќе му каже на пријателот дека бил одличен и ќе го праша дали сака повторно да игра.
Можат да ги именувам своите емоции
Емоционално интелигентните деца се одлични во споделувањето на своите чувства. Развивањето на оваа вештина може да ја научат и од родителите кои, истакнува Рауда, ќе ги истакнат своите емоции додека објаснуваат нешто. На пример, „Разочарана сум што не можам да си ги најдам клучевите“ или „Преоптоварен сум со работата што треба да ја извршам“.
Кога децата знаат да ги именуваат емоциите што ги чувствуваат, многу е полесно да се дојде до решение како да се надмине проблемот, доколку истиот постои и треба да се реши.
Прилагодливи се
Дете кое може лесно да се справи со промена на рутината или кое мирно поднесува разочарувачки вести се смета за емотивно зрело. Значи, детето нема бурно да реагира бурно ако непланирано се откажат плановите, туку ќе ја искористи оваа промена и ќе се прилагоди за да може да го прави тоа што му се допаѓа, само во различни услови.
Тие се добри слушатели
Емоционално интелигентните деца можат да ги препознаат суптилните знаци што другите би можеле да ги пропуштат. Кога им кажувате за вашиот ден, тие прават повеќе од само слушање, тие се вклучени во разговорот, ги откриваат емоциите зад вашите зборови, поставуваат прашања и покажуваат искрена љубопитност.
Можат да се саморегулираат
Децата кои се емоционално интелигентни можат да се справат со големите чувства, да останат смирени кога работите стануваат непријатни и да донесуваат паметни одлуки. И по разочарување, овие деца остануваат мирни и продолжуваат со денот.
Сосема е нормално да се очекува дека детето понекогаш ќе се вознемири, истакнува експертката но важно е да може да си помогне и да се смири, а не да дозволи емоциите да победат и да го преземат рационалното размислување.
