Европскиот центар за превенција и контрола на болести (ЕЦДЦ) вели дека би можеле да имаме тешка сезона на грип, и покрај тоа што бројот на случаи во моментов во ЕУ/ЕЕА е мал.
Главниот пријавен поттип меѓу случаите регистрирани во ЕУ/ЕЕА во изминатиот месец е A (H3N22), кој несразмерно ги погодува постарите лица и е поврзан со пониска ефикасност на вакцината, пишува ЕЦДЦ. Овие наоди сугерираат дека претстојната сезона на грип може да биде тешка за постарите лица и дека обрасците на грип може да се разликуваат од земја до земја.
„Раното откривање на поттипот А (H3N2) сугерира дека претстојната сезона на грип би можела да биде доста сериозна, но сè уште не можеме со сигурност да знаеме како точно ќе изгледа сезоната“, рече Паси Пентинен, шеф на програмата на ЕЦДЦ против грип.
Посебно ранливи се постарите и имунокомпромитирани лица
„Зголемувањето на случаите на грип за време на пандемијата на Ковид-19 може да има сериозни последици за постарите лица и оние со послаб имунолошки систем и може дополнително да ги оптовари здравствените системи кои веќе се оптоварени со Ковид. Потребно е да се преземат потребни мерки и да се заштитат оние кои се најзагрозени“, додаде таа.
Минатата сезона имаше големо намалување на бројот на нови случаи на грип, што укажува дека епидемиолошките мерки како избегнување гужви и одржување на хигиена се ефикасни и во борбата против грипот и коронавирусот.
„Вакцинирањето против Ковид и грип обезбедува и добра заштита од потешки форми на болеста. Луѓето кои работат во здравствениот систем и домовите за стари лица треба да се вакцинираат против грип и коронавирус пред зимата“, советува Пентинен.
Кој е најмногу изложен на ризик од развој на компликации?
Околу 20% од населението секоја година се заразува со грип, а секој четврти човек развива симптоми.
Постарите лица, бремените жени и оние со хронични заболувања како што се срцеви заболувања, проблеми со белите дробови, дијабетес и имунолошки проблеми се изложени на најголем ризик од развој на тешки компликации предизвикани од грип, според ЕЦДЦ.
