Огромното мнозинство од децата користат цуцли, што е сосема во ред, но експертите предупредуваат дека нивното предолго користење може да го попречи развојот на говорот кај децата. Секако, факт е дека нема да му ја давате на вашето дете додека не тргне на училиште и дека во одреден момент треба да го одвикнете од тоа.
Постојат различни стратегии за одвикнување на цуцла, но доколку сакате брзо да „пресечете“, за детето да заборави на цуцлата за три дена, овој метод може да ви помогне.
ПРВ ДЕН
Наутро и навечер, кога ќе дојде време за спиење, кажете му на детето дека гледате дека сака да прави многу работи кои покажуваат дека пораснало. Кажете му дека тоа е добра идеја и дека за три дена ќе дојде време да се збогува со неговата цуцла, советува Марк Л. Бренер.
Уверете го детето дека е подготвено да го направи тоа и дека ќе му помогнете во тоа, вели тој. Разговарајте со него за тоа 30 секунди и потрудете се да звучите одлучно, а не како да барате дозвола од него да го сторите тоа. Ако детето реагира, забележи ги неговите чувства: „Знам дека не го сакаш тоа“, а потоа продолжете понатаму.
Не грижете се дека детето ќе стане нервозно ако однапред го известите дека ја укинувате цуцлата. „Тоа е мит. Исто како и возрасните, и децата сакаат да се подготват за промени, физички, психолошки и емоционално“, вели Бренер.
ВТОР ДЕН
Повторувајте ја истата приказна по 30 секунди два пати на ден, само заменете го делот за збогување со цуцлата „за три дена“ со приказната „утре“. И понатаму трудете се да звучите решително.
ТРЕТ ДЕН
Потсетете го детето дека е трет ден и дека е време да ги собере сите цуцли, доколку ги има повеќе, и прашајте го дали сака да помогне. Ако детето почне да протестира, не обрнувајте внимание, туку решително ставете ги цуцлите во кеса, а потоа однесете ги во корпата за отпадоци.
Совет на Бренер е да му кажете на детето дека цуцлите ќе се рециклираат и дека од нив ќе се направат нови играчки, така што многу полесно ќе прифати одвојување од цуцлата.
Ова, секако, не значи дека детето воопшто нема да се противи и нема да плаче. Покажете сочувство, но бидете цврсти, советува Бренер, додавајќи дека повеќето деца забораваат на цуцлите веќе во наредните 48 часа.
