Врската помеѓу луѓето и животните постои со векови, а тоа е однос кој носи многу придобивки, особено за децата. Како што пишува „Тајмс оф Индија“ (Times of India), позитивните ефекти од дружењето со животни врз развојот на детето се повеќе се препознаваат и ги поддржуваат многу научни истражувања. Од емоционална благосостојба, социјални вештини до развој на емпатија, влијанието на интеракцијата со животните носи многу придобивки за нашите малечки.
Како што објаснуваат психолозите, редовната интеракција со животните може да биде моќна алатка за зајакнување на емоционалната благосостојба на детето, додека безусловната љубов што ја даваат домашните миленици обезбедува безбеден простор за децата слободно да ги изразат своите чувства.
Студиите на оваа тема покажаа дека поминувањето време со животни, како играње со куче или галење мачка, може да го стимулира ослободувањето на окситоцин, кој често се нарекува хормон на љубовта. Исто така, драстично го намалува нивото на кортизол, или хормонот на стрес, што придонесува за зголемено чувство на среќа и емоционална отпорност кај децата.
Дружењето со животни може да поттикне и развој на важни социјални вештини кај најмладите. Имено, преку интеракцијата со животните, децата учат за соработка, комуникација и емпатија, важни квалитети кои можат да се пренесат во нивната интеракција со другите луѓе.
Без разлика дали се работи за тренирање куче, хранење зајак или само набљудување на однесувањето на животните, децата практикуваат основни социјални вештини кои ја зголемуваат нивната способност да создаваат и одржуваат здрави врски.
