Луѓето кои го прележале COVID-19 може да имаат имунитет на вирусот околу пет месеци, според првичните наоди во новата студија предводена од Public Health England (PHE).
Истражувањето SIREN го испитуваше влијанието на инфекцијата врз повеќе од 20.000 здравствени работници од цела Велика Британија и најде само 44 случаи меѓу 6.614 лица за кои се смета дека биле претходно заразени.
Студијата, која сè уште не е рецензирана, заклучи дека инфекцијата во минатото ги намалува шансите за повторно заразување со вирусот за 83% во период од најмалку пет месеци.
„Околу 6.000 од здравствените работници беа луѓе кои имаа докази дека имале инфекција со SARS-CoV-2… и околу 14.000 од здравствените работници беа луѓе кои немаа докази за претходна инфекција со SARS-CoV-2“, изјави Том Вингфилд, постар клинички предавач на Факултетот за тропска медицина во Ливерпул, за Центарот за наука во Велика Британија.
„Наодите сугерираат дека стапките на повторна инфекција во позитивната група биле 83% пониски од негативната група во периодот на следење“.
Истражувањето SIREN го испитуваше влијанието на инфекцијата врз повеќе од 20.000 здравствени работници од цела Велика Британија и најде само 44 случаи меѓу 6.614 лица за кои се смета дека биле претходно заразени
Но, истражувачите предупредија дека заштитата не е апсолутна што значи дека некои луѓе повторно го фаќаат вирусот и дека е нејасно колку трае секој имунитет. Исто така е можно оние кои имаат одреден степен на имунитет на вирусот, сепак, да можат да го носат вирусот во носот или грлото и затоа да го пренесат на други.
„Сега знаеме дека повеќето од оние кои го имале вирусот и развиле антитела, се заштитени од реинфекција, но тоа не е апсолутно и сè уште не знаеме колку долго трае заштитата“, истакна Сузан Хопкинс, постар медицински советник во PHE и ко-водач на студијата, во соопштение.
„Дури и ако верувате дека веќе сте ја имале оваа болест и сте заштитени, можете да бидете уверени дека е малку веројатно дека ќе развиете тешки инфекции. Но, сепак постои ризик да добиете инфекција и да ја пренесете на други“, рече Хопкинс, а пренесува „Си-Ен-Ен“.
