ЕВРОПСКИ ДЕН ЗА РАЦИОНАЛНА УПОТРЕБА НА АНТИБИОТИЦИ (18 НОЕМВРИ) Прим. д-р Љиљана Којиќ: Давање антибиотик кај вирусна инфекција е грешка, а земањето антибиотик превентивно нема никаква смисла

АНТИБИОТИК СЕ ПИЕ САМО СО ЈАСНИ ЗНАЦИ ЗА БАКТЕРИСКА ИНФЕКЦИЈА: Покачени бели крвни зрнца во крвната слика секако над 10000/мм3, а и кога се покачени до 15000, само кај едно до две од 400 деца се работи за бактерија, потоа високи вредности на ЦРП и позитивен брис од грло

Антибиотиците освен што се бескорисни кај вирусните инфекции, тие можат да бидат и многу штетни: Прим. д-р Љиљана Којиќ, педијатар

Денеска се одбележува 18 ноември – Европски ден за рационална употреба на антибиотици во партнерство со Светската недела за подигање на свеста за рационално користење на антибиотиците на СЗО (18-24 ноември)


ПОСТОЈАНОТО, ПРЕКУМЕРНО И НЕПРАВИЛНО КОРИСТЕЊЕ ЈА ЗГОЛЕМУВА ОТПОРНОСТА КОН АНТИБИОТИЦИТЕ!

 

ПИШУВА:
Прим. д-р Љиљана Којиќ
педијатар
♦♦♦♦♦♦♦

 

Зошто не ги сакам антибиотиците,
иако силно верувам во нив?

Јас сум некој, кој  цели 20 години од својот работен век, употребувал исклучително силни антибиотици, и тоа кај многу мали и нежни деца. Ова беа недоносени бебиња, кршливи како стакло, комплетно без имунитет, нападнати од исклучително тешки, животозагрозувачки инфекции, како што се сепса (бактериско труење на крвта) и менигитис (бактериско воспаление на мозочните обвивки). Антибиотиците кои во интензивните одделенија на Клиниката за детски болести и на ГАК ги дававме моите колеги и јас, се исклучително силни и со широк спектар на дејство, онакви, какви што, најголем дел од нас нема да има потреба да користи во својот живот. Кај овие мали и нежни организми лекувањето на овие инфекции беше прашање на живот.

Антибиотиците, кои се едни исклучително корисни лекови, кај здраво, настинато дете не се од никаква корист

На овој начин беа спасени многу животи и многу од тие мали мини-бебиња денес се големи и здрави деца, а некои се средношколци.

Затоа имам голем респект и силна верба во антибиотиците, лекови кои спасиле милиони животи на оваа планета.

Од друга страна пак, можам да кажам дека едвај на прсти од една рака можам да избројам колку пати во последните години сум пиела антибиотик, и тоа било неизбежно, поради инфеција на корен од заб, како и поради лекување на чир на желудник. Не ги пијам, и на моето дете не сум му давала антибиотици без причина.

  • Зошто не ги сакам?

– Не ги сакам кај здравите, лесно болни деца.

Имено, антибиотиците, кои се едни исклучително корисни лекови, кај здраво, настинато дете не се од никаква корист.

А тоа е, за разлика од клиничките интензивни единици главната и предоминантна патологија со која се среќаваме во примарната медицина. Имено околу 90% од инфекциите во раната детска возраст се вирусни. Кај вирусните инфекции од антибиотикот нема ама баш никаква полза, зашто антибиотиците едноставно воопшто не делуваат на вируси.

Давање антибиотик кај вирусна инфекција е грешка. Земањето антибиотик превентивно кај вирусни инфекции нема никаква смисла.

Само една епизода на земање антибиотик доведува до сериозно оштетување на корисниот бактериски свет, кој потоа не може да се опорави со месеци, со што се нарушуваат природните одбранбени механизми на нашето тело

  • Зошто?

Затоа што освен што се бескорисни кај вирусните инфекции, тие можат да бидат и многу штетни.
1. Антибиотиците, и покрај својата голема ефикасност во лекувањето на бактериските инфекции, не се „безопасни“ ниту „наивни“ лекови. Голем број од нив е токсичен за одредени органи и ткива во зависност од начинот на кој се метаболизираат. Поедини предизвикуваат оштетувања на црниот дроб, бубрезите, коскената срцевина, слушниот нерв и на имуниот систем.
2. Антибиотиците се потенцијални моќни алергени. Во ера, во која има значителен пораст на алергиските заболувања, бесмислено е непотребно да додаваме уште еден моќен алерген.
3. Комплетно ги уништуваат и истребуваат нормалните корисни бактерии, кои живеат во нашиот организам. Во последниве години голем број на студии укажуваат на се поголема улога на овие корисни бактерии во одржувањето и на имунитетот и на правилната функција не само на цревата и кожата, туку и на голем број други системи во организмот. Само една епизода на земање антибиотик доведува до сериозно оштетување на овој корисен бактериски свет, кој потоа не може да се опорави со месеци, со што се нарушуваат природните одбранбени механизми на нашето тело.

Антибиотиците, кои се едни исклучително корисни лекови, кај здраво, настинато дете не се од никаква корист. Имено околу 90% од инфекциите во раната детска возраст се вирусни. Кај вирусните инфекции од антибиотикот нема ама баш никаква полза, зашто антибиотиците едноставно воопшто не делуваат на бактерии

4. Често и непотребно давање на антибиотици доведува до еден многу сериозен проблем, а тоа е растечката отпорност на антибиотици и создавање на супербактерии. Нерационалната употреба на антибиотици во тек на изминативе 50 години, веќе довела до создавање на супербактерии кои се отпорни на голем број на антибиотици. Земајќи антибиотик непотребно, доведуваме до тоа да се создадат многу отпорни бактерии. Тоа доведува полека да ги изгубиме како средство за борба против бактериите. Доведува до тоа во иднина да немаме со што да се браниме од бактериите.
Антибиотиците се потенцијални моќни алергени

Затоа:

  1. Антибиотик се пие само со јасни знаци за бактериска инфекција:

Покачени бели крвни зрнца во крвната слика секако над 10000/мм3, а и кога се покачени до 15 000, само кај едно до 2 од 400 деца се работи за бактерија;

– Високи вредности на ЦРП;

– Позитивен брис од грло.

Бактериите во носот се лечат само локално, ако нема лабораториски и клинички знаци за бактериска инфекција, не се земаат сирупи и капсули, ниту инјекции.

  1. Се пие само по препорака на лекар.
  2. Се пие во точната доза, како што препишал лекарот, а не пола или помалку.
  3. Се земаат во точен временски интервал според препорака на лекарот.
  4. Се земаат точно онолку денови колку што е пропишано, не помалку и не се прекинуваат штом ни е подобро.

Само на овој начин ќе ги зачуваме како моќно средство за борба против потешките бактериски инфекции.

» ПОВЕЌЕ СТРУЧНИ ТЕКСТОВИ ОД ПРИМ. Д-Р ЉИЉАНА КОЈИЌ НА СЛЕДНИОВ ЛИНК