Генијален начин како на децата да им објасните што се вируси: Потребно ви е само брашно

Последниве седмици, информациите за ширењето на КОВИД-19 влијаеа на сите нас. Тоа можеби и најмногу го чувствуваат децата, бидејќи градинките и училиштата се затворени, а играњето во парк и слични социјални активности се прекинати или сведени на минимум. Често мислиме дека помалите деца не разбираат што се случува, но тие ја чувствуваат нашата загриженост, страв и реакции.

Некои деца тоа нема да го коментираат, туку загриженоста и стравот ќе ги таложат во своите главчиња и срца. Други деца можеби ќе се пожалат дека ги боли стомачето или на друг начин ќе го “процесуираат“ стравот кој ќе го почувствуваат додека ги слушаат што зборуваат возрасните.

Многу деца ќе бидат збунети и исплашени со новонастанатата ситуација, затоа е многу важно да им објасните што се случува, без разлика на возраста на детето. Секако, важно е начинот на објаснување да го прилагодите на возраста на детето.

Вирусите не се видливи со голо око, па нивното ширење најдобро на децата да им се објасни на сликовит и забавен начин. Ова е една корисна активност, а се што ви треба е брашно или некој друг зачин.

УПАТСТВО:

• Ставете го брашното/зачинот (тие го претставуваат вирусот) во рацете на детето и нека со такви раце ги допре устата, лицето, некој предмет, нека се ракува со вас… потоа заедно прокоментирајте како вирусите лесно се пренесуваат и се шират.
• Потоа заеднички со детето измијте ги рацете и следете колку е важно долго и темелно да се истријат рацете, за да сето брашно/вируси се елиминираат.
• На децата ова може да им биде многу забавен експеримент при која на сликовит начин можат и во најмлада возраст да го разберат ширењето на вирусот.
• Брашното може да го користите и за да на детето му го прикажете ширењето на вирусот кое се случува преку кивањето. Едноставно ставете брашно на дланката и дувнете. Заеднички коментирајте колку далеку вирусот се проширил.

Најважно од се е да не ги лажете децата, бидејќи тие ги чувствуваат нашите емоции дури и кога се обидуваме да ги сокриеме. Затоа, искрениот разговор прилагоден на детската возраст е најдоброто решение.