Британските експерти со загриженост ја следат новата мутација на делта варијантата на коронавирусот, која предизвикува околу 6% од новите случаи на инфекција во таа земја.
Мутацијата наречена AY.4.2 или како што некои ја нарекуваат „делта плус“ носи со себе промени кои ги зголемуваат шансите за преживување на вирусот и му го олеснуваат навлегувањето во клетките.
Врз основа на досега собраните информации, истражувачите веруваат дека не постои ризик дека AY.4.2 ќе успее да ја заобиколи заштитата која ја обезбедуваат постоечките вакцини.
AY.4.2 беше идентификувана уште во јули и се проценува дека е 10% попренослива отколку класичната делта варијанта на коронавирусот.
„Во оваа фаза би рекол да почекаме и да видиме, без да се крева паника. Можеби е малку, суптилно попренослива, но не е нешто апсолутно катастрофално како што видовме претходно“, истакна проф. Франсоа Балу, директор на University College London’s Genetics Institute, за „Би-Би-Си“.
