Пандемијата на Ковид-19 стивна низ целиот свет, а со тоа и многу социјални ограничувања кои беа воведени за да се спречи ширењето на вирусот.
Но сега, се чини дека местото на Ковид-19 го зазедоа цела низа вируси кои се однесуваат на нови и необични начини.
Имено, зимските сезони на грип во САД во 2020 и 2021 година беа едни од најблагите регистрирани и во поглед на хоспитализациите и смртните случаи. Сепак, случаите се зголемија во февруари и пораснаа уште повеќе во пролетта и летото бидејќи беа укинати ограничувањата.
„Никогаш не сме виделе сезоната на грип во САД да се продолжи до јуни“, изјави за CNBC д-р Скот Робертс, помошник медицински директор за превенција на инфекции во болницата „Yale New Haven“.
„Ковидот очигледно имаше многу големо влијание врз тоа. Сега кога луѓето се отворија, местата се отвораат, гледаме дека вирусите се однесуваат на многу чуден начин“, рече тој.
„Никогаш не сме виделе сезоната на грип во САД да се продолжи до јуни“, изјави за CNBC д-р Скот Робертс, помошник медицински директор за превенција на инфекции во болницата „Yale New Haven“
Респираторниот синцицијален вирус, сличен на вирусот на настинка, кој е вообичаен во зимските месеци, покажа пораст минатото лето, со повеќе случаи кај децата во Европа, САД и Јапонија. Потоа, во јануари оваа година, појавата на аденовирус 41, обично одговорен за гастроинтестинални заболувања, стана очигледна причина за мистериозното и тешко заболување на црниот дроб кај децата.
Државата Вашингтон го доживува најлошиот бран на туберкулоза во последните 20 години. И сега, неодамнешната епидемија на мајмунски сипаници, ретка вирусна инфекција која вообичаено се среќава во централна и западна Африка, ги збунува здравствените работници со повеќе од 1.000 потврдени и сомнителни случаи кои се појавуваат во 29 неендемски земји.
Вирусите се однесуваат чудно
Најмалку две генетски различни варијанти на мајмунски сипаници сега циркулираат во САД. Веројатно потекнуваат од две различни инфекции кои се шират од животните на луѓето, соопштија од американскиот Центар за контрола и превенција на болести минатата недела.
Светската здравствена организација претходно минатата недела забележа дека вирусот, чии симптоми вклучуваат треска и кожни лезии, можеби бил неоткриен во општеството „со месеци или можеби неколку години“.
„Двата соја веројатно укажуваат дека ова трае подолго отколку што мислевме. Во моментов сме во загрижувачки момент“, изјави Робертс. Тој истакна дека следните недели ќе бидат јасни за текот на вирусот, кој има период на инкубација од 5 до 21 ден.
„Ограничувањата ја намалуваат изложеноста и имунитетот“
Едно објаснување е дека ограничувањата предизвикани од коронавирусот и носењето маски во последните две години им даваат на другите заразни болести мали шанси да се шират на начинот на кој некогаш се ширеле.
Онаму каде што вирусите успеале да се провлечат, честопати се пропуштени бидејќи јавното здравје воглавно беше фокусирано на пандемијата.
Ова навистина беше случај со појавата на туберкулоза во Вашингтон, соопштија локалните здравствени власти, велејќи дека паралелите меѓу двете болести овозможуваат случаите на туберкулоза да останат недијагностицирани, пишува „CNBC“.
