Првата прегратка на мајката со нејзиното дете, контактот кожа на кожа, е основен чекор, кој го препорачуваат лекарите бидејќи му ја пренесува мајчината топлина и заштитни бактерии на новороденчето. Светската здравствена организација првата прегратка помеѓу мајката и детето дури ја нарекува и „прегратка која спасува живот“.
Контактот кожа на кожа, без разлика дали се работи за гушкање, држење во прегратка или кое било друго изразување на физичка приврзаност, продолжува да биде од животно значење за благосостојбата на детето во детството, но и подоцна во животот.
Научниците решиле да соберат докази дека покажувањето родителска нежност има корист за благосостојбата на децата во детството, но и подоцна во животот
„Поголемата самодоверба, подобрата комуникација помеѓу родителот и детето и помалку психолошки проблеми и проблеми во однесувањето се поврзани со топлината и приврзаноста меѓу родителите и детето“, вели Кристофер Бергланд од Child Trends, непрофитна истражувачка организација.
Извештаите на нивната организација покажуваат дека 90 отсто од родителите на децата под три години ги гушкаат своите малечки секој ден. Меѓутоа, покажувањето нежност се намалува како што растат децата, а само 74 отсто од мајките и 50 отсто од татковците ги гушкаат своите деца, постари од 10 години.
Затоа решиле да соберат докази кои покажуваат како навиката за гушкање на која било возраст може да им користи на децата. „Научните истражувања се секогаш корисна потврда за тоа колку е важно да се практикува љубовта и љубезноста и да се покажува љубов на луѓето што ги сакаме“, објаснува Кристофер Бергланд.
Какво влијание има родителската приврзаност врз детето?
Му помага на детето да чувствува помалку стрес
Дали чувствувате дека вашиот стрес и исцрпеност исчезнуваат кога ќе се вратите дома во прегратката на вашите малечки по долгиот работен ден? Децата се чувствуваат исто. „Топлината и нежноста на родителите штитат од штетните ефекти на токсичниот стрес во детството“, пишува во студијата спроведена на Универзитетот во Калифорнија. Од друга страна, истражувачите откриле дека занемарувањето во детството заедно со намаленото покажување на приврзаност може да влијае на физичкото и психичкото здравје на детето доживотно, доведувајќи и до негативни последици, како што е лошото здравје.
Поради покажување нежности во текот на играта – детето се чувствува сакано
Студијата од 2013 година ги проучувала мајките и децата за време на играњето. Истражувачите откриле дека мајките кои покажуваат поголема приврзаност и поттикнуваат чувство на удобност и слобода за време на играта, имаат посилна врска со своите деца. „Децата чии родители поминуваа премногу време во „контрола“ и водење на играта покажале повеќе негативни чувства кон нивните мајки“, се вели во студијата.
Истражувањата покажуваат дека 90 отсто од родителите на децата под три години ги гушкаат своите малечки секој ден. Меѓутоа, покажувањето нежност се намалува како што растат децата, а само 74 отсто од мајките и 50 отсто од татковците ги гушкаат своите деца, постари од 10 години
„Знаеме дека децата, без разлика на културата, треба да се чувствуваат сакано. Децата го „впиваат“ значењето на она што нивните мајки се обидуваат да го направат. Ако мајката сака да ги контролира работите, но генерално е топла личност, детето најверојатно се чувствува „Мајка ми го прави ова затоа што се грижи за мене и се обидува да го направи она што е најдобро за мене“.
Помага да одгледате посреќно и психички постабилно дете, а еден ден и возрасна личност
Топлината на прегратката може да трае со години! Во една студија од Универзитетот во Нотр Дам, повеќе од 600 луѓе биле испрашувани за начинот на кој биле одгледувани и истражувачите откриле добри вести за родителите кои покажуваат многу нежности.
„Лицата кои добивале многу нежност во детството покажале помалку депресија и анксиозност и генерално биле многу посочувствителни“, вели авторката на студијата, Санди Шварц, додавајќи дека луѓето кои примале помалку нежности „се бореле“ со психички проблеми, биле повознемирени во друштвени ситуации и многу помалку биле способни да се поистоветат со други луѓе.
