Американската академија на педијатри апелира тестирањето на нивото на холестерол во крвта кај децата треба да почне да се прави по втората година од животот, а најдоцна до 10-година, но кај децата кои имаат висок ризик за развој на ваквата состојба. За оваа група ризик фактори се сметаат состојби кога нивните родители или поблиски членови на семејството кои имале срцев удар или им се дијагностицирани затнувања на артерии или други болести на крвните садови, ако некој во потесното семејство има историја на висок холестерол, постои непозната историја на болести во семејството (посвоени деца) или оние кои имаат историја на болест како што е дијабетес, висок крвен притисок, прекумерна тежина.
Оние деца кои ги немаат овие ризик фактори, педијатрите препорачуваат првото испитување на нивото на холестерол да се направи меѓу деветта и 11 година од животот и следното меѓу 17-тата и 21-та година.
Како причина за ова тие го наведуваат податокот дека со одржување на оптимално ниво на холестеролот кај децата може да се спречи појава на срцеви заболувања подоцна во животот. Високиот холестерол е главен причинител за атеросклероза, т.е стврднување на артериите, а тоа е главна причина за болести на срцето. Стручњаците велат дека трагите на маснотии, како сигнал за почеток на атеросклероза може да се јават во првата деценија од животот на децата. Доколку останат незабележани, тие може да направат опасни масни наслаги кои може да ги блокираат и стврднат артериите во возрасниот период.
Срцевите заболувања кај децата се многу ретки, но во тој период ризик факторите за болести на срцето почнуваат да се развиваат. Освен проверка на холестеролот, се препорачува и редовна проверка на крвниот притисок, како и индексот на телесната маса. Она што особено го истакнуваат педјатрите е дека дебелината не е единствената причина за висок холестерол кај децата. Другите причини вклучуваат дијабетес, болести на црниот дроб, бубрезите или нарушување на работата на тироидната жлезда.
