Новото истражување на научниците од Аргентина открива значајно влијание на високоризичните соеви на хуман папиломавирус (ХПВ) врз плодноста кај мажите. ХПВ, кој првенствено е поврзан со рак на грлото на матката, исто така влијае и на здравјето на спермата, што доведува до поголем процент на мртви сперматозоиди и намален квалитет на спермата кај заразените мажи.
Стапките на вакцинација против ХПВ сè уште се ниски кај момчињата во споредба со девојчињата, и покрај зголемената свест за нејзината важност
Во студијата која опфатила примероци од сперма од 205 мажи, научниците забележале помал број на бели крвни зрнца и покачување на реактивните видови кислород, што може да ја оштети спермата и да ја промени ДНК. Овие наоди укажуваат на недоволно проучена област кој загрижува во врска со ефектите на ХПВ врз плодноста кај мажите. Истражувањето е објавено во списанието „Frontiers in Cellular and Infection Microbiology“.
„Овде покажуваме дека гениталната ХПВ инфекција е многу распространета кај мажите, со различни ефекти врз воспалението на семето и квалитетот на спермата според вирусниот генотип на инфекцијата“, објаснува Вирџинија Риверо, инфективен микробиолог од аргентинскиот национален Универзитет во Кордоба. Примероците од мажи со нискоризичен ХПВ, од друга страна, не ги покажале гореспоменатите негативни ефекти.
Се повеќе докази
Наведеното истражување придонесува кон растечкиот број докази кои сугерираат дека ХПВ негативно влијае на бројот и подвижноста на сперматозоидите. Додека тековните клинички тестови за ХПВ се насочени кон жените, вирусот исто така може да предизвика рак и кај мажите, зафаќајќи го пенисот, анусот, устата и грлото. Нееднаквоста во примањето на ХПВ вакцината меѓу мажите и жените претставува грижа за јавното здравје.
„Конкретно, инфекциите предизвикани од високоризичните генотипови на ХПВ имаат повеќе негативни ефекти врз плодноста на мажите и способноста на имунолошкиот систем да ја исчисти инфекцијата“, напоменува Риверо.
Студиите како овие нудат убедливи причини за мажите повторно да размислат за вакцинацијата. Ако ХПВ продолжи да се смета првенствено како „женски проблем“, овој вирус може засекогаш да предизвика хаос и врз плодноста кај мажите и кај жените
Вакцинација на населението
Стапките на вакцинација против ХПВ сè уште се ниски кај момчињата во споредба со девојчињата, и покрај зголемената свест за нејзината важност. На пример, од 2022 година, 61 отсто од момчињата тинејџери во САД примиле вакцина против ХПВ, во споредба со 65 отсто од девојчињата. Во земји како Австралија, која може да се пофали со една од најуспешните програми за вакцинација, стапките на покриеност се високи за двата пола, со вакцинирани 85,9 проценти од жените и 83,4 проценти од мажите.
Многу мажи и понатаму се двоумат дали да ја примат вакцината против ХПВ. „Многу од нив кои се противат на вакцината против ХПВ и ќе речат: Зошто треба јас да ја примам кога е за девојчиња?“, вели Носајаба Осазува-Петерс, научник за јавно здравје од Универзитетот Дјук во САД, која не бил вклучена во истражувањето, но водела друга студија за вакцинација против ХПВ.
Студиите како овие нудат убедливи причини за мажите повторно да размислат за вакцинацијата. Ако ХПВ продолжи да се смета првенствено како „женски проблем“, овој вирус може засекогаш да предизвика хаос и врз плодноста кај мажите и кај жените, пишува „Science Alert“.
