Тешко е секогаш да се внимава на исхраната на децата, бидејќи многу од нив се пребирливи, а како растат, ќе дојдат во допир со грицки и слатки.
Иако децата можат повремено да јадат таква храна и навистина ништо нема да им се случи, но ако се препуштиме на изборот на намирници што нашите деца би сакале да ја јадат, признајте, тој избор би бил сведен на неколку од нив и тие нема да бидат хранливо богати, ниту стимулирачки за нивниот развој. Дотолку повеќе, тие би можеле да јадат помфрит и гумени бомбони секој ден.
Наместо целосна забрана, некои од овие намирници сведете ги на минимум и воведете правило кога ќе се најдат на менито. Според некои истражувања за исхраната на децата, еве кои намирници често се наоѓаат на детското мени, а треба да бидат само повремени посетители на вашата трпеза.
- Гумени бонбони
Ако се вратите во вашето детство, зарем не се искрено гумените бомбони најдоброто нешто што сте го јаделе како дете? А веројатно и вашите деца ги обожуваат. Освен што се сочни и шарени, имаат и интересни форми на кои апсолутно никој не може да им одолее. Иако имаат различни овошни вкусови, во нив нема апсолутно ништо од овошје. Направени со вештачки засладувачи, тие дури и не содржат синтетички витамини.
- Сокови
Да, на сите пишува дека се направени од овошје, и имаат одредена содржина на овошје, се разбира. Но, нивниот недостаток е што содржат и голема количина шеќер, а всушност не ја гасат жедта. Единственото здраво средство за гаснење на жедта е водата. Многу педијатри советуваат да не им се даваат на децата други напивки освен вода и млеко додека не наполнат една година.
- Снегулки
Иако се промовираат како здрави оброци за деца, тие содржат толку многу шеќер што на децата им е подобро да изедат чоколадо за појадок. Со внесување на премногу шеќер во детскиот организам уште од рана возраст, доаѓа до метаболички нарушувања, а чувството на лажна ситост доведува до тоа да децата потоа не можат да јадат друг оброк, кој би бил побогат со хранливи материи, бидејќи едноставно не се гладни. И не само тоа, нивните непца се навикнуваат на одредени вкусови, па тешко прифаќаат други, поздрави и поприродни варијанти на храна.
- Виршли
Иако ви се чини дека детето добива одредена количина на протеини преку виршлата, која би можела да го засити некое подолго време, преку ваквиот оброк добива и многу сол, нездрави масти и разни конзерванси. Дополнително, како што се развиваат афинитетите на децата кон храната, ваквите вештачки вкусови би можеле да создадат отпор на оригиналниот вкус на месото, кое е вистински извор на протеини и аминокиселини неопходни за раст и развој.
- Јогурти со различни вкусови
Јогуртот е здрава храна, многу корисна за децата во развој бидејќи освен што е лесно сварлив, помага и за добро варење. Но, јогуртите со различни вкусови се полни со вештачки бои и шеќер.
- Пуканки од микробранова печка
Иако се повкусни, пуканките во микробранова печка не се толку здрави бидејќи можат да содржат шеќер и сол, а не содржат ниту влакна. Исто така, тие се спакувани во вреќи кои може да содржат различни хемикалии кои се ослободуваат при обработката во микробранова печка. И… уште нешто, се работи само за „празни“ калории.
- Помфрит
Дали знаете дека повеќе од 27% од децата не јадат повеќе од една порција зеленчук дневно, а дури и оние кои ја јадат таа порција, повеќето од нив се однесуваат на пржени компири. Со пржење на висока температура, секоја хранлива материја која постои во компирот исчезнува без трага, а вие додавате маснотии и канцерогени нуспроизводи од согорувањето.
- Лижавчиња и бонбони
Освен што не се безбедни за малите деца, бидејќи лесно може да се задават, полни се со шеќер, а начинот на кој се консумираат го забрзува развојот на кариес. Имено, лижавчето се задржува во забите и до половина час, а во комбинација со плунката шеќерите се задржуваат многу подолго во устата и директно ги напаѓаат детските заби.
