Тимот на доктори-специјалисти од клиниката „Жан Митрев“ заедно со сестрите и физиотерапевтите по две недели интензивно лекување и третмани, постигнаа значајни резултати во подобрување на клиничката слика на младиот Вили Илјов (14) од Штип.
Тој бил донесен по 40-дневна кома, во животозагрозена состојба, резултат на преживеаната тешка сообраќајна несреќа. „Се разбуди по само неколку дена и почна да закрепнува. Како клиника којашто максимално посветено работи за спасување на човечки животи, искрено се радуваме и особено сме горди што денеска младиот Вили си заминува за Штип, со препорака за понатамошно лекување и рехабилитација во соодветна медицинска установа специјализирана за ортопедски повреди, а со цел негово комплетно заздравување и нормален живот кој претстои пред него“, истакнаа од Клиниката.
Хуманост на дело – „Жан Митрев Клиника“ го презеде целосниот третман, лекување и престојот на 14-годишниот штипјанец во клиниката, по апелите за помош и неможноста на семејството да го плати лекувањето на нивниот син.
Вили бил донесен во многу тешка состојба, во кома со инфекции и декубити, откако повеќе од месец дена бил лечен во друга здравствена установа каде се обидувале да санираат тешки повреди на главата и ногата здобиени по страшната сообраќајна несреќа.
„Денеска Вили си заминува дома каде ќе продолжи да се радува на животот, заедно со најблиските“, истакнаа од клиниката „Жан Митрев“, кои во петокот го испратија младото момче во неговиот семеен дом во Штип.
