Тврдоглавите деца можат да бидат исклучително предизвикувачки за родителите – тие одбиваат да соработуваат, не сакаат да учат, да ја чистат својата соба или да го изедат оброкот, а секоја ситуација лесно може да ескалира во конфликт. Во денешниот брз свет, каде што родителите често губат трпение, важно е да знаете како да дејствувате смирено и доследно. Експертите истакнуваат пет ефикасни совети што можат да помогнат во намалувањето на тензијата и зајакнувањето на вашиот однос со вашето дете, дури и кога е тврдоглаво.
- Поставете јасни граници и држете се до нив
Тврдоглавите деца треба да знаат што се очекува од нив и какви се последиците ако тие граници се преминат. Правилата треба да бидат едноставни и јасно наведени, на пример: „Задачата се пишува пред играње“.
Родителите мора да бидат доследни, велат експертите – ако кажете дека ќе има последица, бидете сигурни дека ќе ја спроведете. Ова го учи детето дека правилата не се произволни. Понекогаш најдобриот пристап е да му дозволите на детето да доживее природни последици. Ако одбие јакна, ќе го почувствува студот, а тоа е лекција без оштра казна.
- Бирајте битки, бидејќи секоја не вреди расправија
Не мора да се карате за секоја ситница. Понекогаш е подобро да попуштите ако не е нешто навистина важно. На пример, ако вашето дете инсистира да носи јакна дури и кога е топло, пуштете го – може да ја соблече подоцна. Фокусирајте се на клучните прашања: безбедност, почит и обврски. Помалку конфликт значи помалку стрес и поголема подготвеност вашето дете да соработува кога е навистина важно.
- Дајте му на вашето дете избор и дајте му чувство на контрола
Тврдоглавите деца често бараат контрола. Наместо да давате наредби, понудете му ограничен избор. На пример: „Дали сакаш тестенини или пица за вечера?“ или „Дали сакаш да носиш црвена или сина маичка?“ Ова му дава на вашето дете чувство на учество во одлуката, што го намалува отпорот. Важно е опциите да бидат соодветни на возраста и да не бидат премногу за да не се збуни детето“.
- Пофалете го доброто однесување секогаш кога е можно
Ако се фокусирате само на лошото однесување, вашето дете може да почне да се чувствува критикувано и погрешно разбрано. Наместо тоа, фатете го на дело како прави нешто добро и пофалете го искрено. На пример, „Многу ми е мило што му помогна на брат ти денес!“
Позитивната поткрепа го поттикнува повторувањето на пожелното однесување. Наградата не мора да биде материјална; може да биде дополнително време за игра, заедничка прошетка или прегратка. Ова ја гради самодовербата и довербата на вашето дете.
- Навистина слушајте го вашето дете кога ви зборува
Тврдоглавоста честопати маскира фрустрација, страв или желба за независност. Наместо веднаш да реагирате, обидете се да чуете што вашето дете навистина се обидува да ви каже. На пример, кажете нешто како: „Разбирам дека сакаш да си играш, но сега е време да учиш. Тоа е исто така важно.“
Како што експертите објаснуваат, кога детето чувствува дека навистина го слушате и ги почитувате неговите емоции, тоа ќе биде поподготвено да слуша. Мирните разговори честопати спречуваат големи конфликти и отвораат простор за меѓусебно разбирање.
